Motorsport thuneitu sang leh Formula One thuneitu ni bawk Fédération Internationale de l’Automobile chuan America a inkhuar tur Andretti Formula Racing in F1 luhchilh an tumna chu a pawm.
Andretti Formula Racing hi kum 1978 a world champion Mario Andretti fapa Michael Andretti hova hma la an ni a. American car company lian General Motors hnuaia Cadillac brand hminga tel tum an ni.
FIA lam hian Andretti dilna hi pawm mahse Formula One management lam nen indawrna kalpui a la ngai dawn a, F1 sumdawnna lam chungchangah leh ‘commercial rights holder’ chungchangah he team hi pawm loh a la ni thei.
FIA chuan February thla atang khan kum 2025, 2026 leh 2027 ah te team thar luh theihna kawng hawngin luh tumte ngaihtuahna hun an hawng tawh a ni.
Hetihlai hian Formula One team thenkhatin team 10 baka a dang awm belh thei tur chu ngaihtuah uluk a ngai nia an ngaih thu an lo sawi tawh a, team awm belh duhna aiin duh lohna lam an hnaih zawk nia ngaih a lo ni tawh.
Hetiang karah hian Renault hnuaia awm Alpine chuan Andretti hi an engine hman tir an inhuam thu an lo sawi tawh bawk a ni.