Chelsea tan forward manto tak Mykhailo Muydryk chuan a goal hmasa ber a khung a. Blues hian first half goal hnih neiin Fulham chu tun season a league a an hnehna chan vawi hnihna ni turin 2-0 in an hneh.
Thawhtanni zanah Craven Cottage ah hian Chelsea in January thla a Pound maktaduai 89 a an lakluh Mudryk hi a bikin first half-ah a langsar a. Stamford Bridge a pan hnuah beisei pha lo fo thin mahse tun tumah erawh kawng dik a zawh tanna tur a nih fans ten an beisei ang.
Ukrainian international hian minute 18-naah Levi Colwill-a ball vawrh luh chu a awm a dawngin a insiamrem nghal a, Bernd Leno goal-ah a khung.
Minute khat a liam lehin Chelsea in goal an khung belh a, striker Armando Broja chuan nikum October hnua a goal hmasa ber a khung ve bawk.
Fulham in mahni mualah goal hlauhawm siam an harsat a, second half a Sasa Lukic goal khung tur Robert Sanchez-a’n a dansak chu an chance neih that ber a ni.
Blues tana che tha Mudryk hi malpui hliam a neih avangin second half-ah khelhtir a ni lo.
Mudryk inlar tanna?
Kum 22 mi hian beiseina sang tak neiin Blues a zawm a, amaherawhchu team-ah hmun nghet a inkhuar thei lova. Khelhtir a nihin beisei a pha lo leh thin.
Tunhnaiah a zawna vawi thum inkhel bul tantu zingah telh a nihna a ni a. A manager Mauricio Pochettino-a’n inrintawkna a mamawh thu a sawi tawh.
Pochettino chuan, “Misha in bul a tan chhan chu training-ah hma a sawn a, inkhelh a phu vang a ni.”
“A theihna zawng zawng sengin training-ah a bei thin a. Player naupang zawkte hian insiamrem nan hun an mamawh thin. Misha tan kan club zawm hi thil thar leh danglam tak a ni a, ram dang a khawsak a, boruak dang hip hi thil awlsam a ni thin lo. Dawhtheihna nena kan nghah erawh chuan theihna sang leh talent ropui a nei.” a ti.
Chelsea hian striker Nicolas Jackson chu hrem avangin an chhawr thei lova, a aia an chhawr Broja in goal a khung chu Pochettino chuan a lawmpui thu a sawi bawk.
“Hun rei tak a inkhelh theih loh hnuah Armando-a’n goal a khung a, ka lawmpui. Kan team-ah inkhelhna hmun chang tura inelna tha a awm hi a pawimawh.” a ti.
Blues tan hian second half a Mudryk thlaktu Ian Maatsen chuan Fulham goal ban a pet per bawk a. First team player 12 chhawr thei lo Chelsea a player naupang zawkte an che tha.