Nizana David Beckham chanchin tarlanna Netflix documentary, ‘Beckham’ tihchhuah ah a nupui Victoria chuan a pasalin midang a kawp nia puhna boruak kha an nupa hun tawna hun harsa ber a nih thu a sawi.
Kum 2003 a Real Mardid tana a pasalin football a khelh laia hmeichhe dang kawp nia sawi leh puhna nasa tak kha an nupa hian an lo hnial fithla tawh. A hun laia media chawtui ber a tling.
Spice Girl member hlui Victoria Beckham chuan, “Kan nupa tan khami hun kha hun harsa leh hrehawm ber a ni hial awm e. A chhan pawh, khawvelin min hnuchhawn ta nia hriatna kan neih vang a ni,” a ti.
Sawi chhunzawmin, “Dik takin ka sawi a, kan pahnih pawh khan kan inhmuthiam lo viau hman,” a ti bawk.
He documentary ‘Beckham’ -ah hian hemi chungchang hi sawi lang zauh mah se, chipchiar takin an sawi lang lo thung a ni.
Victoria vek hian, “Spain-ah kan awm lai khan kan pahnih pawhin kan hmu tui lo lek lek hial a, in ‘support’ tawnna boruak kha a awm lova hriatna te hial kan nei. Thil pawi leh rilrunatthlak tak a ni.
“A harsat dan leh hrehawmzia kha engtia sawi tan tur nge ni a, engtia bul tanna neih tur nge tih thlenga sawi harsa em em kha a ni a, min nghawng nat dan thleng pawh khan sawifiah rual a ni lo,” tiin a sawi lang bawk.
‘Beckham’ documentary hi Netflix-ah hmehchhuah theih tawh a ni a, 1999 kuma nupaa insiam David leh Victoria te nun hmuhnawm taka phoalna hi British media te pawhin rating an pe sang angreng hle.