Aizawl : ZPM Chhiahtlang Joint Group buatsaiha mi thar lawm luh inkhawm hmanpuitu ZPM leader Lalduhoma chuan, ZPM-in hmasawnna an aupui rualin, ram rorelnaah Pathian ram a thlen theih nan an au tel niin a sawi.
Thawhlehnia Chhiahtlang Bazar tuala punkawmnaah hian Lalduhoma chuan ZPM chu an policy hmasa ber leh an danpuiah pawh pakhatnaa an dah chu ‘Kan ram rorelnaah Pathian ram lo thleng rawh se’ tih a ni a. Pathian tel lo hmasawnna chu a famkim lo a. Kohhran pawhin a ngai pawimawh tih sawiin, “ZPM kan vote hian kan ram rorelnaa Pathian ram a thlen theihna tur kan vote tihna a ni,” a ti.
Lalduhoma chuan ruihhlo laka an tu leh fate himna turin ZPM chuan thapui a thawh dawn a, budget pawh an ui dawn lo nia sawiin, “India rama AIDS vei tam ber state kan ni a, hei hi kan vei a tul takzet a, ringtute awmdan tur pawh a ni lo. |halai kan thi hnem em a, a bik takin mipa kan thi hnem hle a, ruihhlo vang vek hian nupa inthen pawh an tam em em a ni,” a ti bawk.
ZPM Leader chuan ram rorelna tha din tur chuan candidate tha chauh ni lo vin, eiru lo tur, eiruk laka fihlim ngam neih a ngai tih a sawi a. “Pathian hnenah chutiang mi candidate tur kan dil thin a ni. Chu mai piah lamah Mizoram puma sorkar siam tur chuan tawng hrang hrang hmangte, chi hrang hrangte kan leng vek tur a ni kan ti a, Kohhran hrang hrang pawhin hmun an chang tur a ni,” tia sawiin, mipui movement a nih angin mi tin huapzo tur a nih thu a sawi.
ZPM Chhiahtlang South Group President R Lalbiakchhunga kaihhruai inkhawmah hian PC Vanlaruata, Secretary General, ZPM General Headquarters leh Tuikum Constituency ZPM Official Candidate ni bawk bakah, Lalmuanpuia Punte, PAC member, Hrangturzo Constituency ZPM Official Candidate leh Baryl Vanneihsangi Tlau, AMC Corporator leh Aizawl South III ZPM Official Candidate ten thu an sawi bawk.