Aizawl: Mizoram sorkar leh NABARD tangkawp sum Rs. nuai 273.08 senga din, State Biological Control Laboratory chu nimin khan Agriculture Minister C. Lalrinsanga’n a hawng.
State Biological Control Laboratory din nan hian NABARD-RIDF-XXV sum Rs nuai 250.56 leh state sorkar atanga ruahman Rs. nuai 22.52 sen a ni.
He project hian component pathum – Laboratory Building, Type-4 Staff Qrts leh Laboratory bungraw leinate a kengtel a. Lengpui VC-in ram an pekah hmalak niin M/s Eastmen Consultancy ten he hna hi thawkin December 1, 2020 khan hna an tan a ni.
Khuallian, Agriculture Minister C. Lalrinsanga chuan hlo tur hmanga thlai ei chhetu tihrem tuma hmalaknain hriselna kawngah nghawng tha lo tak a thlen thin thu sawiin, mihring hriselna tura him zawka thlai ei chhetu rannungte eichhe let vetu siam chhuahna tur, State Biological Control Laboratory, Lengpui Vengthara hawn a ni chu Mizoram tana mel lung pawimawh tak a ni, a ti.
Kum 2019-a fall armyworm pangang puangin nasa taka Mizoram puma vaimim chin a nghawng thu sawiin, hemi do letna kal zela pangang thahna, Biological Control Agent tangkaizia hriatchhuah belh a nih hnuah ICAR-NBAIR, Bengaluru nena thawhhona hnuaiah State Biological Control Laboratory chu din a lo ni ta tih a sawi.
Thusawitu dang, Dr. K. Subaharan, HoD, CGU, Indian Council of Agriculture Research- National Bureau of Agricultural Insect Resources (ICAR-NBAIR), Bengaluru chuan State Biological Control Laboratory bultanpui mai bakah kawng engkima puih chhunzawm zel an tum thu a sawi.