Garoland State Movement Committee (GSMC) leh Garo Students’ Union (GSU) chuan nimin khan sorkar laipuiin Tura atanga Shillong-a Door Darshan Kendra (DDK) pisa sawn leh tura a tih duh lohna (sit-in demonstration) an lantir.
Prasar Bharati-in Tura atanga DDK station sawn chhuah tum duh lohna hi Meghalaya Pradesh Youth Congress (MPYC)-in au chhuahpui atanga intan a ni.
NPP Tura MP Agatha K.Sangma pawhin a hmain Minister of information & broadcasting minister hnenah thutlukna siam tawh chu sut leh tura ngenna lehkha a thawn tawh.
GSMC hian Shillong-a DDK, Tura transmission sawn chu Program Production Centre (PPC) tihchhiat phahna mai tur niin an sawi.
Hetianga duh lohna an lantir mek lai hian DDK, Tura-a station director chuan an hruaitute chu a office chamber-a thil awmdan sawihopuiah a sawm.
“Inbiakna neihah hian Prasar Bharati, New Delhi-a Additional Director General chuan tawngkain DDK, Tura chu a hmun ngaia awm leh rih turin a ti a. A hnuah DDK, Tura-ah lehkha a lo thawn bawk,” tiin GSMC Chairman Nikman Marak chuan a sawi.
Lehkha a thlen hnuah hian GSMC leh GSU chuan duh lohna an lantir pawh an titawp lailawk leh rih a. “Prasar Bharati hian an tihlawhtling leh tlin loh kan enzui reng ang,” tiin Marak chuan a sawi bawk.