Aizawl: Bethlehem Vengthlang Congress Group Committee campaign khuhhawnna nimina a hmanpuinaah MPCC President Lalsawta chuan, “Congress thar kan ni tawh,” a ti.
Bethlehem Vengthlang YMA Office-a inkhawmah MPCC president chuan, “Politics ram hluiah hian thenkhat chu kan cheng mek a, pawisa ngah leh pawisa beiseituten kan ram rorelna an luah hi kei zawng ka ngaingam lo va, ka phal lo a ni. Congress erawh chuan pawisa thiltihtheihna kan hmang ve dawn lo,” tiin, Congress thar an nih tawh thu a sawi.
Party thenkhatin hmanrua atan sum hman an tum nia sawiin Lalsawta chuan, “Keini chuan kan nei ve lo. Kan hmaraw neih chhun chu Pathian a ni. He inthlan hi sum hmanga indona a nih kan phak tur a ni lo,” tiin sum hmachhuantute chu hnawl tur leh sum thiltihtheihna danchah a tul tih a sawi.
Hnam lungphum a nghing mek nia sawiin Lalsawta chuan, “Kan sakhua a him lo va, kan ram ngeiah min nekcheptu an awm mek a ni. Kan missionary-te pawh koh haw an ngaih hun a la thleng ang. Chuvangin, kan Mizona humhim tur leh kan sakhuana humhim tur Congress party hi mipuiten min sorkartir leh a ngai a ni,” a ti.
“Vawiinah hian MNF chuan BJP an thawhpui duh a, kan Lok Sabha MP ngei pawhin parliament-ah ngei pawh CAB a thlawp a nih kha. A campaign lai, mipui min mamawh lai chuan mipui thlavang a hauh ngam a; mahse mipui a mamawh tawh loh hnu chuan BJP a thlawp mai a ni. ZPM pawh hian a ruk a ralin BJP thawhpui an tum mek bawk,” tiin, BJP dodal theitu chu Congress chauh an ni tih mipuiin an hriat a ngai niin a sawi bawk.
He hunah hian Aizawl South I INC official candidate Vanlalawmpuii Chawngthu pawhin thu a sawi.