- Lallunghnema, Charity Lodge
Ka inthlahrung deuh nâin ka tawn hriat thenkhat,ka dam chhunga hawrawp puia ziak ni reng tawh tur ka rawn thai kûr ngiai nguai phawt dawn a ni.
Hetia mahni chauhva ka awm a, Ka ngaihtuah, ka ngaihtuah hian ka hringnun kawng chhuk chho buru turu tak mai ka zawh dan hi mak ka ti êm êm mai a. Ka pian leh seilenna khua Thingsai atanga Aizawl a ka tlâk thlâk dan tê, ka chhui kir a. Ka û Vanlalnghâka Ex. Minister (L) in fa en taka min en a, rual ka pawl theih nana tha leh zung a sen nasat ziate ka ngaihtuah kir fo thin.
Matric tha pangngai ve ang reng taka St. Paul’s High School atanga ka zawh ve dante pawl 9 leh pawl sawm kan zirlaia Algebra pakhat mah thiam lova ka tling tlâk dante chu ka ngaihtuah chhuak fo thin. Kan College kal hun laite ka chhui kir a,lung a leng a,leh lamah Pathian min hruaina hi ropui ka ti ve êm êm a ni. Khang hun laia ka class-mate-te zinga mi Lalhmingthanga’n min puih nasat thin ziate kha ka dawn kir chang hian ka lawm veng veng thin a ni. Ani Hmingtea kha lehkhathiam thei tak a ni a, English a thiam a, mathematics a thiam hle bawk a, chuvangin tluk a har hle. Kei chu Algebra thiam lo ka nih avangin Hmingtêa a, tih kha a rukin ka entawn thin a ni.
Khang hun lai khan ka u Nghâka kha mathematician tih a ni a, chhiarkawp thiam lamah a lar hat a ni. Chutiang a nih avang chuan kan maths teacher Simon-a te phei kha chuan maths hi thiam hle turah min ngai a. Ka thiam tlat si lo. “I û in mathematics a thiam si a, enga ti nge i thiam loh ?” min tih khum thin. Min mangan pui thin hle. Maths thiam ila chuan a ti tha pawl chu ka ni ve thin ngei ang. HSLC Exam-naah pawh khan kan Headmaster Bro. Abrahama’n ‘promising student’ tia a koh hran zingah khan ka tel ve hial a ni ve a!
Helam hi ka sawi tum a ni lo tih in hriat ka duh hle. Ka nun kawng bum boh ve zia ka sawi lanna mai a ni. Han sawi zel ila… Mak tak maiin kei ve teh chai hian Class III- promotion examnaah pakhatna ka hauh ve hlauh mai a! , HSLC-ah mark 4-in second ka tling lo va, P.U.C -ah dam lo chunga examin second-ah ka pased a.Ka result hi ka thiante pawhin mak an tiin an awih lo! “I mark sheet kan hmuh phawt loh chua,” an ti hial.
B.A .(Hon’s) kan exam tumin 1st Paper chu group a,b,c, ka chhan pawlh vek avangin exam thei tawh lo tur ka ni. Failed sa tura ngaih ka ni.Mahse, kan Principal leh Staff-ten ka chungthu an ngaihtuah a.Min khawngaih leh duhsakna avangin Principal Room-ah min exam that tir leh a.Ka hun tawng hi khirh ve tak thin chu a ni. Ka beidawng thin hle. Mahse, heti chung hian ka exam tling tla ve ta zel tho a.Vanneih thlâk tak maiin 21st- na ka ni ve ! Thiante zinga hro hrang na zual, K.L.a leh Fakate kha kei aiin an ti tha deuh a,result a lo chhuah veleh tlai lamah lu hai chhawlh khawpin kan lawm ve kha! Ka chhungte leh ka thianten he ka result hi an awih lo hial! Kei pawhin ka inring pha lo. Mahse, Pathian zar liau liau a ni e.
Ka u Nghâka kha Pathian thuhril mi a ni a. Underground (MNF) a awmlai khan Evangelist niin Mire ramah a thiante nen Pathian thu an hril a. An thian hova an rawngbawlna puala Kristian Hlabu-a mi ‘Lalpa chanchin tha puangtute’ tih hi Pu Vanmawia a phuah a ni. Ka u Vanlalnghâka kha talent ngah a ni a. Sport, music, a thiamin a ngaina hle. Zaipawl conductor-a ni thin a. Hla pawh pahnih khat chu a phuah ve. A hla phuah zinga pakhat chi Tûmkau hla a ni a ‘Isua Lal angin a kal e’, tih a ni. Sak a hlawh viau mai. Kristian Hlabuah hian seng lût ve se, ka ti khawp mai.
Khatia ka nu leh pate’n BD zir tura an duh êm êm lai khân ka û chuan IAS exam a duh a Mahse,a tuina lam ber a ni chêk ang chu maw, mak tak maiin Congress-a lûtin NSUI President hmasa berah tangin Pu Ch. Chhungate, Pu Hawla te, Pu Sainghaka te,Pu Sangzualte hnung a zui chho ta zel a ni. Hnahthial biala a din hmasak berin a dahkham ‘chawi’ a.
A hnûah Hnahthial mipui duhsakna changin he Bialah hian a zawnin vawi 3 lai MLA a tling ta a ni. Ka u khan mi a hre thei hle a, campaign a thiam hle tih chu mite sawi dan a ni. Ka u ka chhun a, ka campaign peih ve hle.
Ani, ka û khan Hnahthial Bial kan unauvin kan enkawl ang, sawrkarah lut lo mai rawh , min ti a. A thu ka awih avangin Sawrkar hnaah ka lut ta lova.Pension pawh nei ve lovin ti hian ka ban tlang ta a ni. Congress hi kan thlarau tlatna a ni ber. Politics khelh hi nuam ka ti êm êm thin a.Mahse, tunah chuan khawvel party politics ka bansan a. Hlim takin consumer politics ka luh chilh ta zel a ni.
Thian thenkhatte nen Consumer Association kan din a.Consumer issue chi hrang hrang kan buaipuiin kan hma chhawn thin a.Nuam pawh ka ti a ni!Kei hi chu ‘seh tawh seh tlat,thlah mai mai lo mi’,an tih ang hi ka ni hrim a.Tun thleng hian eng dang mah ka buaipui thei tawh lo va, consumer Chanvo leh Diknate chuan min hneh tâk êm avangin Centre hial ka lo din ve ta a ni. Chawimawina leh Lal lukhum beisei kan ni lo va, insawi theihna pawh ni lovin lawmthu sawina tangka lah ka la ngai hek lo. Hetianga ka tih avang hian kan uang lova, kan inchhuang hek lo. Ka lawmna chu consumer-te tanpui hi a ni. Ka zep law, ka thup hek lo. Nasa zawka beih ka duh avanga sawi chhuak mai chauh ka ni e.Consumer activity-a ka inhman hun chhung kum 25 chuang zet zawt a lo tling ve ta reng mai a.Thianpa Lurate, Pute: Lalûpa, Bualhranga, Lalsawta, Thlahlova,V ansânga, Rintluanga, Rosema, Ka kawipa Rualkhûma Cloney, Rinzâwnate kha ka hre chhuak fo! Pite: Sangdeli, Tanpuii, Thanpui, Pute: Ngurtinkhuma, Ngurthankima, Thangchungnunga, Ngurauva, S.R.Valate ho kha kan hnung leh hmaa kal thinte an ni. Anniho thurel apiang kha kei, Pu Lura, Buala ,Laupa, Ngurauva ho khan kan um zui char char zel a. MCU kan din a, a tirah chuan kan pawr êm êm, insual pawh kan inpeih at reng a ni.
Tunah hian khang ang boruak sa hulh kha a la awm ngai em ka hre law? Thûk zâwka consumer issue lama ka inchiah theih nan hetiang hian hma ka la ta a ni.
Tichuan, Consumer-ten consumer an nih anga Dikna leh Chanvo(right) an neih thu tlangaupui turin Centre For Consumer Education chu thian tha te sawm khawmin kan din a. Republic Mual Vengchungah Office angin hna kan thawk thin a ni. Hna thawh theihna Registration kan nei thlap a. Heti hian nitin kan thawk thei tawh dawn a ni. Lo kal ula,thil leitu leh zuartu chungchang i ti ti ang u.
Centre For Consumer Education thil tih tumte hi a na mên lo khawp mai! Lo thlir teh, i tan leh i chhungte tan a ni e.
CFCE thil tih tumte ka han tarlang ang e:
1) Consumer-te Dikna leh Chanvo humhalh sak.
2) Consumer Advocacy a zau thei ang bera mipui tana buatsaih.
3) Cinsumer-ten ei leh in, tui thianghlim leh tha an hmuh theih nana hma lak.
4) Consumer Awareness Programme chi hrang hrang buatsaih.
5) Consumer-te Dikna leh Chanvo humhalh a nih theih nana, corpus fund ngaihtuah.
6) Mipui Chanvo leh Dikna humhalh a nih theih nan hma lak.
7) Consumer-ten bungraw tha leh hmantlâk an lei theih nân a thawh.
CFCE hian Mizorama pawl hrang hrang office, Department leh Educational Institution 30 chuang hnenah lehkha pe in thawh ho pui atan a sawm a. Govt. Mizoram Law College nen Memorandum of Understanding (MOU) an ziak tawh nghe nghe a ni. Nasa leh zau thei ang bera he Centre hi inzar pharh a tum a. Consumer-te zalenna turin a bei thin dawn a ni. CFCE-ah hian Office Bearer pali an awm a. Chungte chu :
1) Chairman : Lallunghnema
2) Vice Chairman : Lalsangpuia
3) Secretary : C. Rohnuna
4) Asst. Secretary : Dr. Maria Lalrinmawii
5) Treasurer : H. Lalfakawma
- Sr Adviser. : Pute: R.L.Rinawm IRS Rtd leh Pu F.Lalniengate an ni.
Anni thawhpui tur hian Governing Council Member 15 an awm bawk a.A tul dan a zirin inruat belh zel a ni ang . Mizoramah chuan Centre For Consumer Education hi Consumer Institute ding hmasa ber a ni kan ti thei âwm e.He Centre hi mi zawng zawng tana buatsaih a ni.A remchang a nih chuan khaw tinah Representative dah tum a ni bawk. Mizoram tan pawl chhenfakawm tak a nih beisei a ni mek. Harsatna i neih chuan pan ang che.
Tunah chuan kan thupui 2-naah kan lut tawh ang. Hei hi vai rama thil thleng a ni.
Tin, heti hi a ni a, hetiang hian Law Trends chuan saptawngin a tarlang a. “Consumer Court, Bengaluru fines Apple India and its service centre Rs 1 lakh for causing damages to iphone 13” tiin.
Consumer tana hnehna chu a ni ngei mai. Vai tlangval Awez Khan chuan October 2021-ah iphone 13 chu lung si takin a lei a. Mahse iphone battery leh speaker te chu a that loh avangin a tal buai ta hle a. A kum leh August ni 18 2022-ah chuan a phone lo endik turin planet care centre chu a pan a. A tawi zawngin kan sawi ang.
He Care Centre-a thawk an technician – te chuan chawlhkar khat hnua siam thatsak an intiam a. Ni 30 August a , phone dawr a, a va kal leh chuan a phone chhungah chuan thil ban(glue like substance) an hmuh chhuah thu an lo hrilh a. Chuvang chuan phone chu siam that a harsat thu an lo hrilh tel a ni. Mahse, Khan a chuan siam thatsak ngei tura a duhthu a hrilhin a duh anga an tihsak loh chuan Consumer Court-a , a khin tur thu a hrilh nghe nghe a. Consumer Court-ah chuan phone Apple India leh service Centre te chu Khan hian a khing ta nge nge a ni. Tichuan,ngun taka a ngaihtuah hnuin Deficiency in service awm ngeiin Consumer Disputes Redressal Commission chuan a hria a. Apple India leh an service centre chu Rs. 79900 refund tur leh Rs 20000 compensation chawi turin judgment a siam ta a ni.
Tunah hian Aizawl lam pa pakhatin Lunglei lama bike a lei chungchanga complaint-te,electric kal sual thubuaite,bungraw chhe sa inleisak chungchang buaipui tur kan nei zel.Kan va buai thin ve!
I thil lei leh service i hmannaa harsatna i tawh chuan Centre For Consumer Education pan thin ang che. I pan chuan i danglam ang.