Pakistani khawchhak lama Lahore khawpui court chuan Kristian pakhat, a hnathawhpui thin Kristiana leh tuma a beihna lamah Muslim sakhua a sawisel nia puhnaah thiam loh chantirin thi turin a chungthu a rem.
Kum 37-a upa, Asif Pervaiz hi kum 2013-a lung in tang tawh a ni a. A dan hremi Saif-ul-Malook chuan supervisor hlui pakhat chu Muslim sakhaw sawi bawrhbanna lam a thawn thin niin a sawi.
Court chuan Pervaiz-a thiam thu sawite leh engmah pawi a khawih lo nia a sawite chu nimin khan hnawlin thi turin a ti ta a ni.
“Thubuai thehluttu hi Asif-a thawhna thin, la phiarna hmun (factory)-a supervisor thin a ni a, Asif-a hi a hnuaiah a thawk thin,” tiin Malook chuan a sawi.
“A puhnaah anga a chet loh thu leh Islam-a inlet leh tura a sawm zawk thin thu a sawi,” a ti bawk.
A hma pawhin Pervaiz-a hian court-ah hian hna an thawh bânah supervisor hian kovin inlet turin a ti a, a duh loh hnuah a sakhua sawichhiatsakna thu thawn angin a puh ta niin a sawi.
Thubuai thehluttu, Muhammad Saeed Khokher-a aiawha court-a ding dan hremi, Ghulam Mustafa Chaudhry chuan Pervaiz-a hi inlet tura thlem a nih loh thu a sawi a. “Finfiahna a nei a, tanchhan tur a nei si lo va, a puh let ta mai a ni,” a ti.
Chaudhry chuan factory-ah hian Kristian dang pawh an awm a, Khokher-a hian tumah hetianga puh a nei ve lo niin a sawi bawk.