Aizawl : Lalpa Chhiahhlawh Intelkhawm hruaitute chuan Kolasib Press Club-ah thu thar thehdarhtute an kawm a, Mizoramin kumin MLA inthlanpui a hmachhawn turah bial zawng zawngah candidate nei turin an inbuatsaih mek niin an sawi.
Inrinnia thu thar thehdarhtute an kawmnaah an pawl hruaitu Rev Dr Zaichhawna Hlawndo chuan MLA inthlanpui lo awm turah bial tina ding turin an inbuatsaih mek thu a sawi a. Serlui biala Lalpa Chhiahhlawh pawl candidate ni turin Vanlalnghala, Saipum a nih tur thu a puang bawk.
Rev Dr Zaichhawna Hlawndo chuan, an pawl hminga ding tur zawng zawng chuan thuthlung khat, symbol pakhat ‘Zungbun’ an hmang dawn niin a sawi a. pathian Lalram sorkar rorelna hmathlir sawifiahin, “Pathian Lalram sorkar hmathlir hi party manifesto ang a ni lo a, khawvel rama la ding ngai lo, democracy rama la piang ngai lo ram leh hnam din chhuahna tur leh Zofate mahnia ro in rel, independent nation kalkawng tur a ni,” a ti.
Zofate hnam dangte awpbehna hnuai ata chhuah zalena an awmna tur rorelna a ni dawn tih sawiin, “Pathian Lalram sorkar lo ding chuan hnam nihna puan leh Zofate ramri chinfela kan nihna ang taka kan dinchhuahna tur a ngaipawimawh ber dawn a ni,” tiin, Mizoram leh hnam hruaitu tura mihring thlan lalna ni tawh lo vin, Pathian Lalram sorkar a ni tawh dawn avangin, party manifesto, mihring duh dana ram hruaina a ni dawn tawh lo niin a sawi.
Mihring thlan lal tum tawh lo va, Lal Isua lalna tur chauh buaipuia vote Lalpa Chhiahhlawhte tan, Pathian Lalram sorkar kan ramah a din theih nan, ‘zungbun’ symbol-ah thlak vek turin, Rev Dr Zaichhawna Hlawndo chuan mipui a ngen bawk.