Aizawl: Mizoram Synod hnuaia inkhawmpui lian ber dawttu, Presbytery inkhawmpui chu nizan khan a tiak a, presbytery tam zawkin inkhawm tihtlem an duh lo.
Synod Executive Committee-in kumin Presbytery inkhawmpuia Presbytery tinte sawiho tura a dah angin, presbytery tinah inkhawm tihtlem chungchang hi sawiho a ni a, hriat theih chinah presbytery 30 chuan inkhawm tihtlem hi an duh lo a, tuna inkhawm dan kalphung anga la kal zel hi tha an ti a, presbytery pali erawhin inkhawm tihtlem hi an duh thung.
Inkhawm tihtlem tur chungchang hi Presbytery thenkhatin an thehluh angin Synod inkhawmpuiah sawiho a lo ni tawh a, sawiho a nih hnuah Synod Executive Committee (SEC) kutah dah niin Presbytery tinte chu sawiho tura tih leh a ni a, Presbytery hrang hrangten an rel dan atrangin inkhawm tihtlem chungchangah hian Synod chuan thutlukna a siam rin a ni.
Presbytery Inkhawmpui hi October 5, 2023 atang khan Presbytery hrang hrangah neih tan a ni a, a tan niah Nomination Committee te, Finance Committee te leh Sub – Pastoral Committee te an thu a, kohhran upa thlan tharte exam buatsaih a nih bakah zan inkhawmah palai lawmna leh bial report ngaihthlak a ni bawk.
Zirtawpni leh inrinni chhun khan rorel inkhawm neih a ni a, nimin Pathianni chawhmaah upa nemngheh inkhawm neih a ni a, chawhnuah Lalpa Zanriah Sakramen kil hovin upa chatuan ram pan tate sunna inkhawm neih a ni a, nizan khan Presbytery moderator kalchhuakten valedictory sermon an sawi a ni.