Aizawl : ZPM general secretary RD Lalrammawia chuan, ZPM in sorkarna an lo chang a nih pawhin Chief Minister hovin ram bawhchhiatna sual thupha chawiin, chaw ngheia tawngtai a ngai tih a sawi.
Nimina an party pisa-a chhung inkhawmah thu sawiin RD Lalrammawia chuan, “Kan Bible chuan duhamna hi milem biakna a ti a, tangka sum ngainat hi sual tinreng bul a ni a ti bawk. Keini Bible ringtute hi duhamna leh tangka sum ngainatna kawngah kan tlan hum hum a, chu chu kan Pathian huat zawng ber a ni si. Tunah hian a malsawmna ni lo vin, a anchhia kan dawng mek a ni,” a ti.
Ram leh hnam dam lehna chu a hnena inchhira sima hawi kir leh a nih thu sawiin RD Lalrammawia chuan, “He ram hian chhantu a ngai a, chhan anih thuai loh chuan kan boral dawn! Chhantu tur midang an awm chuang lo va, nang leh kei hi chhantu tur chu kan ni,” tiin, a bikin ram rorelnaa thu tura thlanchhuahte leh party-a mawhphurhna sang tak chelh zawng zawng hian mawh an phur zual a. ZPM in sorkarna an lo chang a nih pawhin Chief Minister hovin ram bawhchhiatna sual thupha chawi hian, chaw ngheia tawngtai a ngai niin a sawi.
RD Lalrammawia chuan, “Kan ram leh hnam chhan tur hian, sum leh pai, hausakna te, finna te, lar leh ropui viau te a ngai lo. Pathiana kan rinawmna leh dikna te nei chunga huaisenna kan neih chuan, chu chu a tawk a ni,” a ti bawk.