Aizawl : MNF Lengteng South Block chuan nimin khan Campaign Kick off hun an hmang a. He hunah hian Lengteng bialtu MLA leh he biala MNF official candidate Dr L Thangmawia chuan, Pathian leh mipui zarah MNF an sorkar leh ngei dawn niin a sawi.
Nimin khan Lengteng bial ramri, Tuivawl kama Campaign Kickoff hmanpuitu Lengteng bial MNF official candidate Dr. L.Thangmawia chuan, Pathian leh Lengteng bial mipuite zara MLA term khat a lo chelh ve thei leh MNF hotuten official candidate tura an dah leh ta chu a fel vang ni lovin, Pathian hruaina leh Lengteng bial mipuite tawiawmna vang a ni tiin, lawmthu a sawi a. Tun term kal mek chhunga a tih tur a tih loh ah te, a tih loh tur a tih leh bial mipuite rilru tihnat palh a awm chuan bial mipuiten ngaihdamna a ngen.
Dr L Thangmawia chuan, tun term chhunga Lengteng biala hmasawnna thleng te chu a mi mal tih ni lovin, bial mipuite nena an thawh hona rah a nih zawk thu sawiin, bial mipuite chungah lawmthu a sawi bawk.
Inthlanpui lo awm turah Pathian leh Lengteng bial mipuite chungah a innghah thu sawiin, Lengteng bial leh mipui te tan an thawh chhunzawm zel theih nan an vote hlu tak lo pe tura ngenin, a bial mipui te zarah a tlin leh ngei a beisei thu a sawi bawk.
He hun hi MNF Lengteng South Block President Lalduailova Sailo in a kaihruai a ni.