Thla thar 7th November 2023 mai hi kum 5 chhunga kan ram enkawltu tur sawrkar kan thlanna ni tura ruat chu a lo ni ta. Political party leh mipui lam pawhin inthlan puan ni atangin inthlan chu titi tam ber ani chho nghal a. Tling tur leh tur lo, sawrkarna siam thei party mai an awm ang em? Siam thei lo awm ta se tu party berin nge kum 5 chhung chu thuneihna chelh dawn tihah inrinsiak hun a thleng chho ta.
Hetih lai hian kan ram inthlan chu thianghlim leh fel fai taka kan neih chhoh a, bawlhhlawh kai lova kan zawh theih dan tur ngaihtuahtu lam NGO te leh a khaipa Mizoram Peoples Forum pawh nasa taka che chhuak tura beisei an ni nghal a ni. Anni lam pawh an thil tum ber inthlanna thianghlim thlenna tura ke pen nghal turin an inpuahchah fel tawhah ngai bawk ila.
Amaherawhchu hun kal tawha kan inthlanna en chuan duhthu a la sam lo hle a. Election commission in inthlanna senso a nuai 20 hman an phal tawk laiin nuai za tel seng ral sawirik a tam em em a. A bik takin Aizawl pawn lamah hian sum sen a nat thu a ri tam a. Hetiang anih avang hian MPF pawh hian Aizawl hi chu an vil vak ngai lo turah ngai ta ila. Tin, thingtlang lamah pawh inthlan apianga sum hekna deuh bik thin bial hi target deuh se a duhawm khawp mai. Mizoram chhim lamah chuan MPF te an awm lova, chuvangin Aizawl district, Champhai, Khawzawl, Saitual, Serchhip, Kolasib leh Mamit district te an enkawl tur chinah dah ta ila. Aizawl khawpui na taka enkawl a ngaih hmel lem loh chuan diatrict lian vak lo ho hi target bikin che se hma an la thei lehzualin a rinawm.
Tin, MPF te hian an tum ber inthlanna thianghlim a thlen ngei loh chuan anmahni mualphona ani tih hi pawm ngam bawk sela. Mawhphurhna an la ngam a, mipuiin kan ring anih tawh hi chuan an hnaah hlawhtlinna hmu turin an chet nat deuh pawh a ngai dawn a. Dim leh zah nei lek lova, miin an huat khawpa an chet ngam pawh a ngai dawn a ni. Nasa taka an tang chunga inthlan zawha tute emaw sum sen tamzia sawi tur awm leh thin hi MPF mualphona a ni tih pawh pawm ngam se. Ti ve ting tang, ti leh tak tak ngam lova mipuiin kan ngaih hunah meuh chuan an tan chet a har tawlh tawlh ang. Tunah pawh heng Mamit leh Kolasib district te hi chu an luhchilh nghal rum rum a ngai tawh tih boruakah a lang reng tawh a. Motora tlan paha ti leu leu lova, khawtina an hnathawktute an tlawhchhuah nghal zar zar a ngai nghal a ni. Tuna thuthang kan hriatah pawh nuai.500 chuan ka tling zo mai ang tihte a ri nawk tawh a ni a.Inthlan zawha chumi khami chuan nuai 300 a seng, nuai 500 a seng tihte hi hriat leh tur awm tawh lo hram turin MPF hian hma han hruai teh se.