- Ruata
Nissan chuan an compact SUV hralh kal tak Magnite chu automatic transmission hmang, AMT an phochhuak veleh ta a. Rs. Nuai 6.49 (ex-showroom) man atanga intan tur a ni.
Automatic transmission hmang lirthei hi Mizoramah pawh a tam chho ve ta viau mai a. A hma chuan manual khalh thiam lo te khalh tur nia ngaia nuihzat te pawh an awm hial thin a. Khawvel changkang zelah hian khawvel hmun changkang zawkah te leh India ram ngeiah pawh hian automatic khalh hi a tam zawk an ni mai ang em tih tawh tur a ni a. Automatic transmission hmang te hi khalh a awlsamin kawng tam takah lirthei khalhtu tana awlsamna leh hahdamna thlen tu a ni a. Kan intihhmuh chho zel ni te pawhin a hriat a, a tam chhoh deuh deuh a rinawm a ni.
Nissan Magnite hi Nissan company in compact SUV an tihchhuah mek niin a man pawh sang lo tak, mawi leh lei hlawh tak a ni mek a. Tuna AMT version lo chhuak thar leh pawh hian India ram pum ang pawhin duhtu leh leitu a ngah phah viauin a rinawm a. Automatic transmission lirthei kan uar chhoh zelah hian market lamah pawh he model rawn chhuak leh hian Nissan company a puih viau a beiseiawm a ni.
- Nissan Magnite AMT chu le
Nissan Magnite AMT hmang hi Magnite EZ-Shift tih hming put tir a ni a, variant 4 – XE, XL, XV, leh XV Premium te a awm a ni. Magnite AMT hian 1.0-liter naturally aspirated petrol engine hmangin 5-speed AMT gearbox a hmang dawn a. He khawl hian 71bhp power leh 96Nm torque a pechhuak thei a ni.
Nissan chuan Magnite AMT ARAI-certified mileage-ah petrol litre khatin km 19.70 a tlan thei tih an tarlang a. Tuna manual version chhuak mek hian km 19.35 a tlan thei thung a ni. EZ-Shift transmission hnuaiah hian full automatic mai bakah manual driving mode-ah pawh a dah theih dawn a, a khalhtute tan duhthlan tur a tam dawn tihna a ni a, hei hi AMT technology-a kan hmuh tlanglawn a ni reng a ni.
Nissan Magnite AMT hian creep function, anti-stall, kick-down capability, hill start assist, leh vehicle dynamic control te a nei dawn a. Dual-tone rawng thar pahnih Blue and Black color scheme te a nei dawn a ni.
- Kuro Edition pawh tichhuak
Tunhnai mai khan Nissan India hian Magnite Kuro Edition an tichhuak a, hetah hian khawl chi 3 – petrol-manual, turbo-petrol manual leh turbo-petrol CVT te a awm a. Kuro Edition hi Rs Nuai 8.27 (ex-showroom) man atangin a intan a ni. Nissan Magnite Kuro Edition-ah hian 8-inch touchscreen infotainment unit with Android Auto and Apple CarPlay connectivity, 7-inch digital instrument console, wireless phone charger, 360-degree camera, rear air-con vent leh automatic climate control te a awm a ni.
Nissan pawhin an lirthei neih saah tan lain lirthei leitute tana itawm leh lei manhla tak turin an lirthei an duang chho mek a. Lirthei man to uchuak si lo, mawi leh tha, changkang bawk si niin Magnite hi Mizoramah pawh nei an tam ta viau a. Lirthei leitute leh lei tum te tan chuan enchhin ngei ngei chi, duhthlan tur tha tak a ni awm e.