United States chuan Afghanistan-a mi puih hna thawk tura ngenna a pawm niin he rama roreltu, Taliban chuan an sawi.
August thlaa US sipaiten an chhuahsan hnua an inbiak hmasak berna, Qatar-a an zawh hnuah thuchhuah an siam.
Mipui mangangte tanpui dan tura inbiak bakah hian kal firfiak pawlte nuai chimih an nih theih dan tur te, US khua leh tuite hawpui an nih theih dan turte pawh an sawi.
US thuneitute chuan an inbiakna chu a hlawk tih an sawi a, hetih rual hian Taliban-te chu an chet dan zel an thlir reng tur thu an sawi.
US hian an inkawm avang hian Taliban hi an pawm ta tihna a nih loh thu an sawi bawk.
Pathianni zana thuchhuah an siamah Taliban chuan, “US aiawhte chuan Afghan-te mamawhah an pui dawn a, tanpuitu pawl dangten hna an thawh theihna turin an hmunhmate pawh an buatsaihsak dawn a ni,” an ti.
Taliban hian ‘tanpuitu pawlte nen mi tanpui hna thawhnaah an thawkho vang a, langtlang takin thil an kalpui ang a, ram dang mite pawh an chet vel an phalsak’ dawn a ni.