India-in mi firfiak a man duh ber zinga mi, Shahid Latif-a chu Nilaini khan Pakistan-a Sialkot-ah tu nge a nih hriat lohvin a kap hlum.
Latif-a hi kum 2016-a mi firfiakten Pathankot beia venhim hna thawktu mi pasarih an thahnaa thluak bur ber nia hriat a ni.
Police chuan Latif-a hi mosque chhungah thah a ni a, tute nge a titu an chhui zui mek tih an sawi.
An beihnaah hian Jaish firfiak pawla mi pawh a thi tel a, police chuan mi firfiak chetna tiin an sawi a. A kaptute hi motorcycle hmangin an tlanchhe zui nghal.
Latif-a hi Sialkot-ah hian Noot Masjid-a Maulvi a ni a. Police officer Hassan Iqbal chuan chhui zuiin a titute man ngei an tum tih a sawi.
Jaish-e-Mohammed nena inzawmna nei, Latif-a hian Sialkot atanga kaihruaiin January 2, 2016 khan mi firfiak pali chu Pathankot Air Force Station bei turin a ti a. Indian Air Force mi pasarih an thi a, a beitute pawh hi thah vek an ni a, ni thum lai inkahna a thleng a ni.
Kum 1994 khan firfiaka chetna avangin India-ah man a lo ni tawh a. A chungthu ngaihtuahin lung in tantir a ni a, kum 2010 khan a chhuak a, Waqah ramri kânin Pakistan-ah a lut a ni.
Kum 2010 khan Indian sorkar chuan kum 41 mi a nih laiin mi firfiak a man duh zingah a telh.
Latif-a thah hi Pakistan-a mi firfiakte beihna thalam ber a ni a. Thla hmasa khan Karachi-ah Lashkar-e-Taiba mi, Mufti Qaisar Farooq leh Ziaur-Rehman te chu thah an lo ni tawh.
February khan Hizbul commander lawk, Bashir Ahmad Peer chu Rawalpindi-ah thah a ni bawk.
Anni bakah hian thla 18 liam ta chhungin Pakistan-ah hian mi firffiak thah an tam hle bawk.