Argentine football legend Lionel Messi chuan Major League Soccer season a zawh hunah loan in team dang a zawm dawn lo tih Spanish football expert Guillem Balague chuan a sawi.
Inter Miami captain kum 36 mi hi a club hlui Barcelona leh Saudi Pro League lamah MLS season a zawh hunah loan a kal mai tur anga sawi a ni a. Inter Miami hi Inrinni a FC Cincinnati laka an tlawm hnuah MLS Playoffs atan an tling pha lo chiang tawh a. October 21-ah an regular season a zo ang.
Messi hian September thla tir atang hian hliam a neih avangin Inter Miami tan hian MLS-ah hian minute 72 bak a la khel lo.
MSL regular season a zawh hunah Argentina in Uruguay leh Brazil te November 17 leh 22-ah an hmachhawn dawn a. Hemi hnuah hian Messi hian thla khat chawlh vel a nei tura ngaih a ni.
Balague chuan, “Messi hian footballer dangte ang thovin thla khat chawlh a hmang anga, hei vang hian Saudi emaw hmun dang a pan lovang.” a ti.
Chawlh a hman zawh hnuah Miami-ah a kir leh anga, February atanga tan tur MLS season thar atan inbuatsaihna a nei tan ang.
Messi hian Inter Miami tan hian game 13 atangin goal 11 a khung tawh a, Leagues Cup-ah champion pui nghal mahse MLS lamah a la inkhel tam thei lo.