Kan state hi state hnufual leh ei leh bara harsa kan ni a. Sum thawhchhuah kan nei mumal lova. India ramah pawh state hnufual ber zinga chhiar kan ni bawk. Hnufual leh rethei na na na chu hriselna lamah pawh kan hniam em em a. Chhungkaw tin mai hi hrisel lohna avanga buai deuh reng kan ni.
Chutiang chu kan nih avangin chhungkaw tin hian hrisel lohna avangin in enkawl nan kan sum neih ang ang hi kan khawhral nasa a. Mipui mangang pawh Sawrkarah kan innghat nasa a. Sawrkar ber lah chu sum harsatna in a bawhbuai reng a lo ni bawk si. Kan state sawrkarin mipui tana hman tangkai turin health care policy a han duang a. Mipui hnenah pawisa dah turin min han ti a. Chu kan pawisa dah hmang chuan sawrkarin a lo do letna nen kan in enkawl thei ang tiin mipui min zirtir a. Kan han dah a. Mahse, kan sawrkar chuan kan pawisa dah chu a do letna tur kha scheme ah khan pawisa a lo dah ve thei ta silo. Kan in enkawlna chu he scheme hnuaia hmu let leh tura zirtirna chu bumna ang lekah a chhuak ani ta ber a. Mipuiin beisei neia bill kan han theh luh ve te chu a pil vang vang mai thin a. Kan chief ministerin chhungkaw tin tan cheng nuaihnih hisapin pawisa hi sawrkarin a dah vek ani ti a assembly house meuha a sawi chu mipuiin fiamthu thawh nan an hmang zui ta zawk hial a. Mipui chu beiseina nei lovin kan hawi ta vel mai mai a ni ber.
Health care policy nei tha a, mipui harsatna chhawk thei scheme duang tur chuan tuna kan hotute hi chu rin leh ngaihna a awm tawh lova. Hralth care nei tha tehnaah chuan an tla fel der tawh a ni.
Health care policy nei tha a tihlawhtling tha hi khawvelah pawh sawrkar thaa ngaih an ni a. Tehna pawimawh ber pakhat a ni. America sawrkarah pawh mipuiin rinna an nghahna chu health care policy hi a ni a. Kan sawrkar dinglai a hlawhchham a. Chutih laiin kan opposition party lam, sawrkarna siam beiseia mipui hnena inzuar mekte hian heti khawpa mipui mamawh policy hi an sawi ri mang hauh lo mai a. Kan manganna health care hi rorel tuma in zuar mekte hian kan hriselna lam hi an ngaihtuah miah lo em ni aw a tih theih a. Mipui mamawh phuhruk tura policy pawh nei mumal lo chu sawrkarna han ken tir ngawt chi an ni bik hauh lovang. Kalphung tharah health care chu hlamchhiah ani ta anih chuan, chutiang sawrkar tur chu mipui tan pian tir chi ani dawn em ni?
Kan dinhmun uluk taka thlir a, kan hrisel lohnate hre rengin opposition party te hian health care an kalpui tum dan hi min hrilh thei se a va duhawm em.