United States thuneitute chuan Secretary of State-in Colombia a tlawh hma lawkin he ramah hian Havana syndrome avanga damlo an awm nia sawi a awm chu an chhui chiang mek niin an ram chanchinbute chuan an tar lang.
Bogota-a US embassy-a thawk chu hliam danglam tan neiin a damlo va, a nat dan hi a benga ri ring tak ri avanga chau leh luhai a ni.
Hetiang natna hi kum 2016 khan Cuba-a hriat hmasak ber niin ram hrang hranga US palai bul hnaia awm zingah hetiang natna nei hi sawi a awm zui ta fo a ni.
A awm tan dan chiah hriat a ni lo va, thenkhat chuan eng hmanrua emaw hmanga tih niin an sawi thin a, finfiahna a awm lo.
Thawhlehni khan Wall Street Journal chuan tuna thil thleng hi tar lang hmasa berin US Ambassador to Colombia Philip Goldberg chuan email a thawnah damloh dan danglam tak, US sorkarin Havana syndrome tia a sawi mai anga na chu September thla laihawl atang khan an neih thu a ziak tih an tar lang.
Colombian President Iván Duque chuan New York Times hnenah he thil hi an chhui mek thu leh US chu a chhuinaa a hmahruaitu an ni tih a sawi.
Havana syndrome tuar tawh American-te chuan an bengah na vawng vawng khawpa ring a ri thin niin an sawi a. A tuar tawh zinga mi 200 vel chu thla eng emaw zat chhung luhai leh chauvin an awm thin.
A tuartu zahve vel hi CIA-a thawkte an ni thin niin Times chanchinbu chuan a sawi.