- Ramhluna Hnamte
Ni 18.10.2019(Zirtawpni) zing dar 8:25 a khawvel chhuahsan ta zaithiam C.Lalrinmawia kha kei nen tak hi chuan kan inkawm tam ve lem lo na a, zai leh rimawi a tui ve ta chu, hun lai in ang kan lo ni bawk nen, Aizawl a zin nikhua chuan kan in zui ve fo thin. Keini thian ho AIR Shillong a kan zai vung lai vel kha 1975- 1980 vel a ni. A ni C.Lalrinmawia te, F.Lalnunfima, Liandailova Chhangte leh midangte kha AIR Aizawl product an ni thung a, AIR Aizawl kha a power a chak ve vak loh avang khan Shillong velah kan man pha ve lem lo. Mahse Zorama chhuah changin an zai kan ngaithla nasa em em thin a, tuina lam in ang ta chu kan inkawm in kan zaiho ve fo thin. A hma deuh fe hian Virthlileng Group, AIR Aizawl a an zai ka ngaithla tawh a, he group a zai pu ber hi amah C.Lalrinmawia hi a ni a, an lar thawkhat hle a, an hla pakhat ‘Aw I Zunzam a Uai chu a Na e’ tih phei kha chu an lar pui tak zet a ni. Ama pual a solo artiste a nih hnu hian lar namenloh in a lar chho lehzual ta a ni.
Zir Sangzela Hnamte, Zira Hnamte, F.Lalnunfima, Liandailova Chhangte leh amah C.Lalrinmawia te hian group dinin ‘All Mizoram Concert’ an in vuah a, seventies tawp lam leh eighties laihawl thleng khan Mizoram hmun hrang hrangah Concert Tour an lo buatsaih tawh thin a, khang hun lai a anmahni tawk theuh a zaithiam lar an ni bawk a, mi duh leh lawm an hlawhin bawrtu pawh an ngah thei hle thin. An member pakhat Zira Hnamte in min hrilh danin he group hi Mizo Zaimi Inzawmkhawm(MZI) lo pian chhohna a bul tumtu pawimawh tak a ni.
Vanduaithlak takin an memberpangate a hian chatuan ram an pan vek tawh a ni.
C.Lalrinmawia audio cassette (Tape) hnuhnung ber ni ta ‘Ngaihzuali’ kha 2004 tawp lam emaw 2005 tir lamah emaw a released niin ka hria a, Lunglei a ka awm lai kha a ni a, copy 100 chu hralh sak turin min rawn ngen ve a, ka hralh sak zo vek a, 2005 May thla a Aizawl a hnathawk tura ka phei khan ka office ah lo kalin a hralhna man hi ka lo hlan a, a lawm thiam kher mai. All Mizoram Concert Hlimen a an zai tum(1981) khan Aizawl a ka zin phei lai a ni a, Guest artiste ang in min zai tir ve nghe nghe.
C.Lalrinmawia hian eng hla leh eng genre pawh hi a sa thiam em em vek mai, mi sak hnu a sak(cover) pawhin ama style in mawi takin a her rem thiam zel a, a sa mawi em em zel mai a ni. A hla sak ho hi mawi ka tiin nalh ka ti vek mai. Chung zingah chuan C.Durthanga hla ‘Khawnge Ka Di Ve Kha’ tih a sak hian min hneh zual hle thin. A phuahtu in a ngaihzawng thi ta a sunna hla a ni a, amah C.Durthanga ngei pawh hian he hla C.Lalrinmawia’n a sa hi chu a lung a awiin a duhthusamin a sak ngei ka ring thin.
Zira Hnamte nen Oct ni 15,2019(Thawhlehni) khan Chaltlanga an inah kan han kan a, a tawng peih tawh meuh lo na in, kan in chibai a, a lung a leng ve hle tih erawh kan hre thei ( C.Lalrinmawia boral hnu kum 1 leh thla 2 na, Nov. ni 10,2020 ah Zira Hnamte pawhin min boral san ve leh ta a ni.RH). Khami kan tlawh tum kha a lei taksa ka hmuh tawpna chu a ni ta mai. Mizo zinga ‘Super Singer’ tih ngam khawp a zaithiam special em em C.Lalrinmawia chu kan zingah awm tawhlo mahse la a zai hlamawi leh a sakhming erawh Zorimawi khawvelah a cham reng tawh ang. Vawiin a thih champhaphak vawi 4 naah hian a nupui leh a fate Pathian awmpuina leh thlamuanna ka dil sak a ni. (RH : 18th Oct.2023).