Congress Legislature Party (CLP) Leader Zodintluanga Ralte chuan Congress party-in an tum ber chu retheite tihbeidawn ni lovin, retheite dinhmun chawikan a nih thu a sawi.
Thorang bialtu MLA ni mek leh he biala Congress party official candidate chuan nimin khan Sesawm, Laisawral leh Marpara khuate a tlawh a. Marpara-a amah lo hmuaktu mipuite hmaah thu sawiin, “NLUP Rs nuai 1 kan sem dawn kan ti a, kan sorkar tuk lawk-ah party inthliar bikna awm miah lovin, mi nuai chuangte hnenah kan sem mai a ni,” a ti.
Congress party-in sorkarna an chang leh a nih chuan ‘Tang Puihna’ hmangin thalai, nu leh pa, upa lam thlengin puihtlaka hnathawktu an nih phawt chuan Rs nuai hniha an puih vek tur thu leh tan ngaihna hre lote puihna tur pawh an duan fel vek tawh thu a sawiin, “Congress party chuan kan ti ang kan tih chu kan tihlawhtling thin a, tang puihna Rs nuai 2 pawh hi Mizoram mipuite bum nan kan hmang ve dawn lo a ni,” Zodintluanga Ralte chuan a ti bawk.
MNF party chungchang sawiin Zodintluanga Ralte chuan, “Sorkar an châk lutuk avanga mipuite bum nana SEDP Rs Nuai 3 kan sem dawn ti a, NLUP hmu tawh zawng zawng pawh an pek leh vek tur thu hial an party President Pu Zoramthanga’n a sawi a, an sorkar hun tawp dawn lamah mi tlem tête hnenah Rs 25,000 vel an sem thei tawk a, mipui tam tak beidawng leh rilru nain an awm mek a ni,” a ti a. Hetianga mipuite an beidawn em em lai hian MNF party hian SEDP sem leh tur anga thingtlang khaw lama thu nasa taka an thantir leh phei hi chu pawi a tih thu a sawi.
Zodintluanga Ralte chuan ZPM chu inthlan hmachhawn a nih hmain a vawrtawp an thleng tawh niin a sawi a. Chief minister atana an zawrh ber pawh nimin lama thu a sawi leh vawiin lama a sawi a inkawkalh thin tih a sawi a. A fing apiangin ZPM hi an chhuahsan hmasa a, ram kaihruai tur hian Mizoram mipui hian sorkarna an pe dawn lo niin a sawi bawk.