Aizawl : MNF Adviser Dr R Lalthangliana chuan party thenkhat tan district thar pathum te enkawl chhunzawm a har dawn avangin, a hringtu MNF sorkarin an enkawl chhunzawm ngei a ngaih tur thu a sawi.
MNF South Tuipui campaign khuhhawnna Hnahthiala neihah, South Tuipui biala MNF candidate ni bawk Dr R Lalthangliana chuan, Hnahthial mipuite’n thisen chhuak meuha an lo beih tawh leh district dang pahnih pawhin an nawr nasat em em chu, MNF sorkar atanga thla riat lekah fuke kimin an tipuitling tih sawiin, “A bak tih tur tam tak a la awm a. District din ringawt a tawk lo va, district office ten an nih dan tur ang la ni lo tikim turin thil tam tak tih tur a la awm avangin, a hringtu ngeiin kan enkawl chhunzawm a ngai a ni,” a ti.
Dr R Lalthangliana chuan, “Sub-division siam te, hnaruak hnawhkhah leh quarters sak tur tam tak a la awm a, district pathumte hi kan enkawl chhunzawm leh ngei a ngai a. Party dang thenkhat tan chuan chhunzawm a har ngawt ang,” a ti bawk.
MNF Adviser chuan sitting MLA-ah chuan Chief Minister Zoramthanga nen kum 30 term an hman mek thu a sawi a. Pathianin hriselna a pe chu lawmawm a tih thu sawi bawkin, MNF MLA 27 neih mekte hi an that tlan avangin, term lehah pawh an sorkar chhunzawm ngei dawn niin a sawi.