Aizawl: Special Judge, POCSO Act chuan a fanute pathum kumtlinglo vawi tam pawngsual thintua puh kum 46 mi chu thiam loh a chantir.
Court-in thuremna a tihchhuah-a tarlan a nih danin, Lawngtlai district chhung khaw pakhata kum 46 mi hian a nupui awm loh hlanin a fanu pathum kum 12, kum 10 leh kum sarih te chu a pawngsual thin a, naupangte hian an pa chet dan an nu bula an thlen hnuah August 5, 2022 khan Lawngtlai Police station-ah FIR a theh lut a, August 10 khan man a ni.
Thubuai ngaihtuahtu Special Judge (POCSO Act) leh District & Sessions Judge, Lunglei Judicial District Vanlalenmawia chuan thuhretu hrang hrangte a koh hnuah thutlukna siamin a fate pathum pawngsual thin tua puh hi Section 6 POCSO Act, 2012 hnuaiah thiam loh a chan tir a, kar leh thawhtanniah a hremna tur hi a puang ang.