Mizoram People Forum (MPF) chuan nimin khan Aizawl Press Club-ah Mizoram Journalists’ Association (MJA) member-te kawmin political party-te nena an thawhhona thuthlung bawhchhiat chu mipui zah lohnaah an ngaih thu an sawi a, kawngzawh tawh lo turin political party-te an ngen.
MPF hruaitute chuan thawhhona thuthlung chu political party hrang hrang aiawhte nen tum eng emaw zat sawiho hnua siam a nih thu sawiin, “Political party president theuhten hming an ziah hnan a ni. Heti chunga zah lo taka bawhchhiate chu mipui zah lohnaah kan ngai,” tiin, thawhhona thuthlung bawhchhiatna a awm nia hriat a nih chuan tute pawhin MPF-ah report/complaint thehlut turin an ngen.
MPF hruaitute chuan social media hrang hrangah inthlan chungchanga thu belh chian dawl lo thehdarh leh mi mal inbeihna uchuakte ti lo tura mipuite ngenin, “Hetiang a awm a nih chuan thuneitute hnenah hma la tura thlen a ni ang,” an ti.
Thawhhona thuthlung angin inthlan puan hnuah chuan political party-ten kawngzawh phal tawh loh a nih thu sawiin MPF hruaitute chuan, “Amaherawhchu, tun hnaiah Mizoram hmun thenkhatah thuthlung bawhchhiaa kawngzawh thawm hriat tur a awm nual a, pawi kan ti hle,” tiin, political party-ten thuthlung zaha kawngzawh huaihawt tawh loh tur a nih thu an sawi.
MPF hruaitute sawi danin kawngzawh anga sawi theih hi Aizawl bakah Tuidam leh Darlawn tlangdungah a awm.
- MPF thusawi dangte :
- Thawhhona thuthlung anga house to house campaign a awm lohna atan district, constituency leh local forum-te an ngen
- Khawtlang huapa candidate-te intiamna neih tir loh tur
- T-shirt sem tawh lo turin mipui an ngen
- Manifesto leh candidate-te chanchin MPF hriatpuina-a sem tur
- Public meeting/street campaign neih dawnin MPF-in an kaihruai tur a ni
- Tunhnaiah flag tar hi kan uar thar leh niin a lang a, tar theih zat bituk aia tam tar lo turin kan inngen bawk a ni.