A lehkhabu thar tihchhuah tur, ‘The Woman In Me’ chuan boruak a siam viau tawh mai a. ‘Tu rilru mah tihnat a tum loh’ thu aupui mektu Britnesy Spears hi media lam chuan thupui mak leh dangdai tak takin an umzui reng tho.
He lehkhabu ah hian a chhungril a phawrhchhuah bakah thuruk thahnem tak a leih baw tel bawk. Kum 19 a nihin a rai tawh thu te, pawl riat a nih laiin zu a intan thu te leh thil dang a tam mai.
Tlangzarh hma hauh atangin mite ngaihven a hlawhin, media chawtui tak a ni chho mek a, hetih lai hian lehkhabu tihchhuah a tumnaah ‘Mi rilru tihnat tumna a nei lo’ tiin a sawi.
Kum 41 mi Spears chuan Instagram leh X-ah thu sei angreng tak a ziak a, entu a ngah hle. “Ka lehkhabu thil tum ber chu engtikawng zawng pawha midang rilru tihnat loh hi a ni tawp mai. Khatih laia keimah kha a ni a, hun kal tawh a ni. Chanchinbu headline ka chhiar mek te hi ka duh lo hle. Hengte vang hian rimawi khawvel hi kum 4 kalta khan ka chawlhsan daih chhan ni,” a ti.