India tan Virat Kohli bawk hun pawimawhah a inlar leh a, Mohammed Shami in ball hmangin an khingpuite nghaisa leh bawkin New Zealand lakah wicket li in an chak.
ICC Men’s Cricket World Cup thlengtu India hian hnehna an chan avangin match nga atang vawi nga an chak tihna a ni a. Match li hmabak la neiin semi-final tling turin an dinhmun a tha zel.
India tana tournament tha taka khel mek Kohli-a’n six vawi hnih leh four vawi li vua in run 95 a siam a, India innings khaidingtu niin over 48 chhunga chak tura an mamawh run 274 an siam theihna chhan lian tak a ni.
Vuak hmasak tir New Zealand lakah India tan Mohammed Shami-a’n wicket nga a la a. Black Caps no.2 leh 3 batsman-te wicket a lak hnuah an innings tawp lamah wicket thum a lak belh a, run 130 siamtu Daryl Mitchell pawh heng zingah hian a tel.
New Zealand tan Rachin Ravindra chuan run 75 siam bawkin over 50 chhungin run 273 an siam.
India in chak turin run 274 an mamawh a, captain Rohit Sharma chuan ball 40 atang run 46 siamin bul a tan thatpui. Mahse Men in Blue batsman-ten run rate tihsan an tum a, ball vaw thei viau mahse a khat tawkin wicket an hloh fo.
Tawnhriat ngah Kohli-a’n chiai miah lovin a din ngheh a pawimawh tih a hria a. Tul lova ‘risk’ la lovin a ding rei chu India chak theihna chhan lian tak a ni.
Kum 34 mi Kohli hian India legend Sachin Tendulkar-a ODI century siam record tluk theihna remchang a nei a. Mahse run nga a la mamawh tihin Glenn Phillips-a’n a catch out.
Kohli hian tun tournament-ah innings nga atangin 85, 55, 16, 103 leh 95 te a siam tawh a ni.
India captain Rohit Sharma chuan, “Mohammed Shami khan a huntha neih a chhawr tangkai chiang hle. Player theihna sang tak nei, tawnhriat ngah a ni a. A khelhdanah ka lawm hle.”
“Kan bowler-ten dinhmun thaah min dah a, 280 kan kai tir lo kha thil tha tak a ni. Fak an phu.” tiin a sawi a.
“Virat hi a chiai ngai lova, a hun takah kan mamawh ang taka chet hi a lo tih fo tawh thin a ni.” tiin a sawi belh bawk.
- Match Summary
New Zealand 273 (50 Overs)
Daryl Mitchell 130 (127)
Rachin Ravindra 75 (87)
Mohammed Shami 5/54 (10)
Kuldeep Yadav 2/73 (10)
India 274/6 (48 Overs)
Rohit Sharma 46 (40)
Virat Kohli 95 (104)
Lockie Ferguson 2/63 (8)
Mitchell Santner 1/37 (10)