Colombia-a ruihhlo tawlh thin (drug trafficker) man duh ber leh an rama mi sual rual (criminal gang) hotupa ber chu man a ni.
Dairo Antonio Úsuga hi Otoniel tia hriat lar a ni a, sipai, air force leh police tangkawpin beihpui an thlaknaah Inrinni khan an man.
Sorkar chuan a lumanah $800,000 an chhiar lai a ni a, United States phei chuan $ matduai nga zet an chhiar.
President Iván Duque chuan Otoniel-a man a ni thei chu a lawmawm thu TV-a thu a sawinaah a sawi lang.
“Kan rama tun um zabi chhunga ruihhlo tawlhna laka kan ram hlawhtlinna lian ber a ni,” a ti a. “Tun tuma hlawhtlinna hi kum 1990 chhova Pablo Escobar-a a tlukchhiat nen baka khaikhin theih dang a awm lo,” a ti.
Otoniel-a hi Colombia hmarthlang lam, Panama nena an inrina bul lawk, Antioquia province hmun kilkhawr takah man a ni.
Man tuma beihpui thlaknaah hian sipai 500 bakah helicopter 22 zet thawh chhuahpui a ni a. Police officer pakhat a thi ve bawk.
Otoniel-a hi thingtlang kilkhawr tak taka a inah a khawsa kual thin a, hei hi thuneituten a chin an hriat theih loh nana a tih a ni a. Phone a hmang ngai lo va, a aia thil thawnna (courier) a hmang.
Tun tuma a awmna erawh hi chu chawlhkar hnih kal ta atang khan hriat chhuah a ni tih El Tiempo chanchinbu chuan a tar lang.
Police chief Jorge Vargas chuan a che vel hi signal intelligence expert 50 rualin thlalem thlalak atangin an chhui zui a. US leh UK agency-te pawh an inrawlh bawk tih a sawi.
AFP news agency-in Duque-a thu sawi an tihchhuahah chuan tun tuma an chet chhuahna hi an ram chanchina an sipaiten beihpui an thlakna lian ber a ni.
Colombia thuneitute hian a hnuah an sipaiten Otoniel-a a kuta thluna rubber boot a bun, thla an lakpui laite an tilang.
Tun hmain kum 50 mi hi officer sang rualin man tumin vawi tam an lo thawk chhuak tawh a, hlawhtling an la awm ngai lo.