Gaza hmar lam atanga chhim lam pantu Palestinian tam takte chuan an ram panah hian dinhmun a chhiat em avangin an kir leh hlawm tawh niin UN thuneituin a sawi.

Israel chuan Gaza City leh hmar lama cheng mi maktduai 1.1 chuang zette chu an himna turin chhuak turin kar hmasa lam khan a ti.

A chhuahsantu tam takte hian awmna tur, ei tur leh tui a awm loh avangin an kir leh phah niin UN thuneitu hian a sawi.

Hamas enkawl health ministry chuan darkar 24 liam ta chhungin Israeli-ten thlawhna atanga an beihna avangin mi za tel an thi tih an sawi bawk.

Israeli sipaite hian Gaza-a Hamas helho hmun tam tak an kap fuh niin an insawi a, lei lam atanga beih chhunzawm ngei an tum nia hriat a nih mek laiin thlawhna atangin na zawkin an chhu mek a ni.

Strip-ah hian indona a chhuah hnuah mi 5,000 chuang an thi tawh niin health ministry chuan a sawi a. Israel hian October 7-a an rama luta an mi 1,400 chuang thata mi 222 zet mantu Hamas-ho laka phuba a lakna kal zel a ni.

Israel hian electricity leh tui an lak luhna tam zawk a titawp a. Hetih lai hian Inrinni atang khan ei tur leh damdawi phur lirtheite chu Egypt-a Rafah crossing atangin luhtir phal a ni leh tawh.

UN-in a chhut dan chuan Gaza-a cheng hmun thuma thena hmun hnih, mi maktaduai 1.4 vel zetin chawlhkar hnih liam ta chhungin an chenna in an chhuahsan a. |henkhat hi hlauh vang an ni a, thenkhat erawh an in leh lo chhiate a ni.

Chhim lam khawpui, Khan Younis-ah chuan mi 6,00,000 atanga 7,00,000 chuang baihvai an awm mek a, damdawi in, club leh thingpui dawr bakah khawlaiah an riak.

Gaza-a UN agency for Palestinian refugees (Unrwa) director Thomas White chuan baihvai tam zawk hi ni khatah tui litre khat leh Arabic chhang hlawh pahnih khat ringin an khawsa hram hram niin a sawi.

Chhim lamah hian civil mite hmun kah a nih reng bawk si avangin mihring tana khawsak an harsat em em a, ‘hei vang hian hmar lamah an kir leh hlawm’ niin a sawi.

“Hmar lama an in, an sumdawnna leh an nunna himna atana tlanchhiain chhim lam an pan a, hetah hian awmna, ei tur a vâng em em em si a. Mi tam takin tui bawlhhlawh an in a, an dinhmun a chhe hle a ni,” a ti.

An zinga mi, Khan Younis-a awm, Riyad Jaabas chuan Reuters news agency hnenah, “Gaza City atanga um chhuah kan ni a, Khan Younis a him niin an sawi a; mahse, Gaza pumah hian himna a awm si lo,” a ti.

Inrinni khan Gaza City-ah Israeli sipaiten leaflet thlakin Wadi Gaza lui chhim lam pan lote chu ‘firfiak pawl nena inzawmna nei nia ngaih’ an nih tur thu an ziak.

Tuialhthei buaina

Gaza-ah hian tanpuina thil phurh luh tan mek a ni a, UN chuan ei tur, tui leh damdawi chi hrang hrang phur lorry 34 zet a luh chu an lawm tak zet tih White chuan a sawi a, hetih rual hian loory za rual phur mamawh a nih thu a sawi a, tuialhthei mamawhna a sang hle niin a sawi bawk.

“Buaina a chhuah hma kha chuan Gaza-ah hian ni tin truck 455 chuang a lo lut ziah a, tunah hian kan mamawh a tamzia chu a a hriat hle a ni,” a ti.

“Ni thum emaw daih chauh Gaza-ah hian tuialhthei a awm tawh bawk,” a ti a. “Hei hi Israel-in Gaza-a mamawh phur luhtir a phal a ngaihna a ni a, kan puihna pek thin a tawp vek dawn a ni. Tui tihthianghlimna hmunte chuan tui an tlachham tan mek a, damdawi inte pawhin an pindan tam tak chu an tithim tan mek tawh a ni,” a ti.

Gaza-a health ministry chuan sorkar damdawi in 13-a an generator chuan tui an tlachham tawh a, nunna chhan nana mamawh zualpui thilah chauh an hmang tawh a, heng zingah hian nausen 130 upna atana an hman pawh a tel tih a sawi.

Israel erawh chuan an ram atanga tuialhthei pek luh hi an la phal lo zel a, Hamas hian an sipaite hman atan an lo ru thin niin an sawi.

Israeli defence ministry agency chuan Pathianni khan Hamas hian ‘tuialhthei litre maktaduai khat’ an la dah tha niin a sawi a. An pawl hian ‘mamawhna hmunah hman an phal lo’ niin a sawi a, ‘an lei verh tihen nan te, rocket launcher atan leh an in atan an hmang a ni’ tiin an sawi.