Arunachal Pradesh-a hnam rukte hnena permanent resident certificate (PRC) pek tura rawtna awm duh lova mipuiten lungawi lohna an lantir mekah nimin khan curfew bawhchhiaa pungkhawmte chuan Itanagar-a deputy chief minister Chowna Mein-a mi mal chenna ((private resident) an hal a, deputy commissioner pisa pawh an suasam bawk.
Zirtawpni khan lungawi lova pungkhawm an hnawh darhna lamah police-in silai hmet puakin damdawi ina luh ngaiin mi pakhatin hliam a tuar a. Hemi lungawi lo lehzual hi mipui tam tak khawlaiah chhuakin vantlang thil leh lirthei an tichhia a ni.
Mipuite hian Niti Vihar-a deputy chief minister mi mal chenna in an hal a, Itanagar deputy commissioner pisa an suasam bawk a. DC pisaah hian lirthei eng emaw zat an hal a. Itanagar police station an luhchilh bawk.
Lungawi lote hian Naharlagun railway station an dang bawk a, hei vang hian damlo phur rel takngial pawh nimin tuk atang khan a che thei lo.
Zirtawpnia thil a thlen hnuah Inrinni atang khan Itanagar leh Naharlagun-ah curfew puan a ni a, heti chung hian Inrinniah khan police leh mipuite chu lungin an intawng a, mi 35-in hliam an tuar a, heng zinga 24 hi police an ni a. Inrinni vek hian sipaiten Itanagar leh Naharlagun-ah hian flag march an nei bawk.
Itanagar leh Naharlagun-ah hian internet service tihtawp rih a ni a. Bazar, petrol pump leh dawr bakah ATM tam zawk khar a ni tih police-ten an sawi.
Union Home Minister Rajnath Singh chuan Arunachal Pradesh mipuite chu zaidawh turin Inrinni khan a ngen a, Chief Minister Pema Khandu pawh biain an boruak a sawipui bawk.