Aizawl : MPCC President Lalsawta chuan sum nei te chauhin ram rorelna in pui, Legislative Assembly an luah loh a, mi dik leh mi tha te’n an retheih vanga ram rorelnaaa an tel ve theih lohna chu Congres party chuan tha a tih loh avangin, thiat turin hma an la zel dawn niin a sawi.
Thawhlehnia Lungdai Bazar-a vantlang inkhawm buatsaihah thu sawiin MPCC President Lalsawta chuan, inthlan avanga sum luang chiam tura ngaitute chu ram hmangaihtute an ni ngai lo va, chutiang chuan an kal san thin a, rilru puthmang dik lo te chu ui chi pawh an ni lo tih a sawi.
Lalsawta chuan, MLA inthlanpui lo awm turah a hmaa hausa nia an hriat loh, lo hausa ta viau te’n sum an ui lo hle nia sawiin, “Suma lei theih sal neih hunlai a liam tawh a. Mihringte hi Pathianin duh taka a din leh a siam kan ni a, suma lei theih kan ni lo. Lal Isua thisen chauha lei kan ni,” a ti.
Congress President chuan, ram rorelna tha turin a reltu mi 40 an that a ngai a, mipui tha viau mah se, a reltu MLA an that loh a, a lu ber hming a hliau miau chuan rorelna tha an nei ngai lo vang tih a sawi a. Kumin inthlan hian Mizoram a khawih thui dawn a, mithiam leh rintlak bial enkawltu tur Tuirial bial mipuite chu an duh thlanna hmang fimkhur turin a chah bawk.
He hunah hian Tuirial bial Congress candidate Dr Zodinliana Pachuau pawhin thu a sawi.