Aizawl: MPCC President Lalsawta Congress party-in an lo tihsual tawh tam takah ngaihdam dilin, tisual leh tawh lo turin an insiam rem a, an insiam tha tawh niin a sawi.
Nilainia Sihphir Kawn Vengah Congress party-in Iptepui banna (campaign office) hawn hun an buatsaih hmanpuitu MPCC President Lalsawta chuan, “Congress party-in thil tam tak kan lo ti tawh a, a then chu a tha ang a, a then chu a tha lo ang. Kan lo tihsual tawh tam takah ngaihdam kan dil a, tisual leh tawh lo turin kan insiamrem a, kan insiamtha tawh a. A mihring hi chu a ngai reng kan la ni ang, Congress party hruaitute pawh hi a ngai reng kan la ni. Mahse, kan insiamtha a, Mizoramin hma a sawn a, sorkar tha siam turin Congress party hi kan rawn kir leh a ni,” a ti.
Lalsawta chuan Congress party-in sakhaw zalenna (secular) a chawi nung zel a. Mahse, tuna central-a sorkar mek BJP avangin Kohhran kaltlanga Missionary-te pawhin zalen takin pathian rawng an bawl thei tawh lo niin a sawi.
BJP in Mizorama regional party a thawhpui theih tur chu MNF leh ZPM te an nih thu sawiin Lalsawta chuan, “Chu chu mipuiten min hriatthiam pui ula, kan ram tlu chhe tur thlir liamtu ni lo va, kan siamthat theih hunlaia siamthat anih theihna turin BJP thawhpui theih ve loh tur Congress party candidate-te lo vote vek turin mipui ka sawm che u a ni,” a ti.
Congress president chuan, “BJP hian North-East-ah chuan keini Mizoram tih loh chu sum hmanga a namthluk theihho chu a namthlu vek tawh a. Central BJP hian Mizoram BJP hi sorkar tir an tum vak lo, tul pawh an ti lo anih hmel a. Mizo mipui hian Mizoramah BJP angin sorkarna siam khawpin kan vote tling dawn lo tih an hria a. Chuvangin, an luhka atan regional party an rawn thlang chat a, MNF an thawhpui mek a, ZPM hi an thawhpui leh tura an beisei mek a ni,” tia sawiin, mipuiten sorkar tha an neih ngei theihna turin an party candidate-te vote vek turin a sawm.
Upa H. Lalrinzuala, Jt. Secy kaihhruai inkhawmah hian Aizawl East I INC official candidate Lalsanglura Ralte pawhin thu a sawi bawk.