Lebanon-a Hezbollah hel pawl hotu chuan Palestinian hel pawl pahnih, Hamas leh Islamic Jihad hruaitute nen Israel lakah ‘hnehna pumhlum’ an chan theih nana an thawhho dan tur an sawiho tih a sawi niin Hezbollah thuchhuahah an tar lang.
Thuchhuahah hian Nilainia an inkawmnaah hian Hezbollah aiawhin Sayyed Hassan Nasrallah, Hamas deputy chief Saleh al-Arouri leh Islamic Jihad chief Ziad al-Nakhala an tel tih tar lan a ni a, an inhmuh khawmna hmun erawh tar lan tel a ni lo.
“Hruaitute hian Operation Al-Aqsa Flood tan a nih atanga thil thleng zui zel te leh kawng hrang hranga chetlakna an sawiho va, heng zingah hian ramri kâna Lebanon leh Palestine luah rama inbeihna pawh a tel,” tiin Lebanese sorkar chanchinbu, Al-Manar chuan a tar lang.
October 7-a Hamas fighter-ten Israel an beih thut tuma mi 1,400 vel an thah leh Israel-in phuba lak zui nana Gaza an chhut zuinaa mi 5,700 chuang an thih tawhna chungchang an sawi a ni.
“Sayyed Nasrallah-a hian Nakhale leh al-Arouri te hnenah hian khawvel pum huap leh an awmna lai ram bial chhunga tangho tlata hnehna pumhlum an chan theih dan tur leh Gaza leh West Bank-a nekchepa awm mekte rawng taka beihna tihtawp hmak dan tur a sawipui,” tiin thuchhuahah hian tar lan a ni.
October 7-a Israel beih an nih hnuah khan Hezbollah pawh hi ni tin deuhthaw Israeli sipaite nen Israeli-Lebanese ramri-ah an inkap a ni.
Lebanese hel pawl hian Nilaini khan an fighter pahnih thah leh an ni tih an sawi a, heng mite nen hian buaina a chhuah atangin fighter 40 lai an chân tawh niin an sawi.
Health ministry chuan Israel-in Thawhlehnia a beihnaah Palestinian naupang 305 telin mi 704 zet an thi leh niin an sawi bawk.
UN Office for the Coordination of Humanitarian Affairs chuan Thawhlehnia heti zat zet thi an awm hi indona a chhuah hnua ni khata thi an tam ber tum niin an sawi.
West Bank-ah pawh Israeli sipaite nena an inbeihnaah mi 100 vel an thi bawk niin Palestinian health ministry chuan a sawi bawk.
Israel leh Palestine inkara buaina chhuak mek hian Middle East pum a kan kai hlauhthawnna a awm mek lai hian Israel siaite chuan an indo thlawhna hmangin Syrian sipaite hmun an kap tih an sawi a, hei hi an thenawm ram atang hian rocket-a beihnaan tawh an chhan letna niin an sawi.
Sipaite hian engmah a bak an sawi chiang lo va, rocket pahniha kah an nih thu leh Syrian army kah a nih leh nih loh an sawi lo.
Syrian state news agency (SANA) chuan Israeli-ten chhimthlang lam khawpui, Deraa an beihna avang hian sipai pariat an thi a, pasarih velin hliam an tuar bawk tih an puang.