Manchester United in UEFA Champions League a an tana hnehna pawimawh tak an chang a. FC Copenhagen lakah 1-0 in an chak.
Old Trafford-ah United hian huntawp dawnah penalty an chawi a. Goalkeeper Andre Onana chuan Jordan Larsson penalty pet a save sak.
Defender Harry Maguire chuan minute 72-naah February 2022 hnua a goal hmasa ber a khung a. United chakpuitute beisei anga an khelh loh thin avanga sawisel hlawh thin ve ve an ni.
United in hnehna an chan avangin Group A-ah point thum an hmu a, match thum hmabak la neiin knockout stage luh inbeiseina an la nei.
Erik ten Hag-a pawlte erawhin khelhdan nghet an la nei lo tih a hmuh theih a. First half-ah Copenhagen an hlauhawm zawk. Second half a ball pass thiam Christian Eriksen dahluh a nih hnuah an hlauhawm zawk.
Group A inkhel dangah Bayern Munich tan Harry Kane chuan goal khungin Jamal Musiala goal khung tur a siamsak bawk a. Tun season-ah goal 11 khung tawhin assist vawi 6 a nei bawk a. Bayern Munich in 3-1 in Galatasaray an hneh.
- Arsenal an chak
Mikel Arteta pawlten Lens laka an tlawm hnuah hnehna chan ngei tumin Ramón Sánchez-Pizjuán an lut a. 2-1 in Sevilla an hneh.
Gunners tan striker Gabriel Jesus a pawimawh hle a. Fimkhur taka football an khelh ve ve laiin halftime dawnah Brazilian striker in ball tha a hnampui Gabriel Martinelli tan a pe a, goal-ah a khung.
Second half tan tir lamah Jesus-a’n an goal hnihna mawi takin a khung ve leh bawk a. Sevilla tan Nemanja Gudelj chuan goal khat a tauh lut ve leh bawk.
Inkhel tawp dawnah erawh Gunners striker Jesus chu inhliam avangin lakchhuah a ngai a. A hliam nat zawng erawh hriat a la ni lo.
- Bellingham bawk
Jude Bellingham-a’n a chetthat a chhunzawm a, Real Madrid tan goal khung lehin Braga lakah 2-1 in hnehna an chang.
Estádio Municipal de Braga a inkhelah Real tan Rodrygo chuan goal hmahruai a khung a. Second half ah Bellingham-a’n goal khungin tun season-ah club tan vawi 12 inkhelin goal 11 a khung tawh.
Alvaro Djalo chuan Braga tan goal khat khung ve mahse Real Madrid in match thum atanga hnehna chang vek turin an hmahruaina an humhim tluan a ni.