Dream Theater band dintute zingami leh drummer hlui ni bawk Mike Portnoy chuan kum 12 hnu-ah original band a zawm leh ta.
A aiawhtu Mike Mangini chhuak a, a dinhmun ngai rawn luahlumtu Mike Portnoy chungchang hi band pawhin nimin khan official taka puangin, “Dream Theater-a drummer Mike Portnoy lo kirleh thu hi phur tak chungin kan puang a ni,” an ti.
Band hian line-up thar an sawichian rualin, studio album thar atan an bur nghal dawn tih an sawi a, 2009 kuma ‘Black Clouds & Silver Linings’ hnu lama Portnoy-a drums khawngri kan hriat leh hmasak berna tur a ni ang.
Portnoy-a lo kirlehna hi classic line-up- (1999/2000)- singer James LaBrie, guitarist John Patrucci, bassist John Myung leh Keyboardist Jordan Rudess te intuarthar lehna a ni tel dawn bawk a, fan te tan hei lo liama chanchin tha leh lawmawm hi a awm chuang lo.
Dream Theater-a a lo kirlehna hian tuna drummer Mike Mangini hun tawp a rawn nemnghet ta bawk a, 2011 kuma khawvel hraita drummer thar audition an neih a, an lakluh kha a ni.
Magnini hian Dream Theater-a kum 12 drums a vuak chhungin studio albums panga ngawt mai a sualchhuahpui.