Atletico Madrid in tum hnih si phur mahse an sut ve ve a. UEFA Champions League Group E inkhelah player 10 in inkhel hmang zo mahse 2-2 in an inhnehtawk.
Glasgow a Celtic Park a inkhelah hian Scottish club striker tlanchak Kyogo Furuhashi chuan minute 4-naah goal a khung a. Atletico defender pahnih inkarah chak taka tlan lutin a pet goal.
Minute 25-naah Antoine Griezmann chuan penalty an hmuh chu goal ban pet per mahse a per let atangin an si phurh a sut.
Minute thum hnuah Luis Palma chuan Celtic tan goal khung lehin hma an hruai lehnghal.
Atletico in second half tan tir lamah goal an khung ve leh a, striker Alvaro Morata chuan tun season a a goal 8-na a tauh lut.
Mikhual team in chakna goal khung tumin a tawp lamah na takin goal an nawr a, chance tha pawh hloh nual mahse midfielder Rodrigo de Paul chu yellow card a hmuh nawn avangin hnawhchhuah a ni a. A tawpah point khat hmu turin an tang tluan thei zawk a ni.
Celtic manager Brendan Rodgers chuan, “Kan kheltha hle a, mahse chak turin ka ti tam tawk lo a ni. Khatiang anga football rang kha kan khel tam lova, a tawpah kan hah tawh tih kha a hriat deuh.” a ti a.
Atletico Madrid coach Diego Simeone chuan, “A tha lai kan la ang a, second half kha kan kheltha hle. First half-ah erawh kan pha lo nasa a ni.” a ti ve bawk.
Inkhel dangah Dutch club Feyenoord tan striker rinrawl Santiago Gimenez chuan goal hnih a khung a, Ramiz Zerrouki chuan goal khung bawkin 3-1 in Lazio an hneh.