Central YMA president thar atan vice president ni lai, Lalhmachhuana thlan a ni.
YMA Inkhawmpui Lian neih zawh takah kum 2023 atanga 2025 chhung Central YMA hruaitu tur thlanna neih a ni a, post by post-a inthlanna hi buatsaihin president-ah Lalhmachhuana, Chaltlang Lily veng thlan a ni.
Ani bakah vice president-ah general secretary ni lai, Prof. Lalnuntluanga, Khatla West chu thlan tlin a ni a, general secretary-ah assistant secretary ni lai, Prof. Malsâwmliana, assistant secretary-ah treasurer ni lai, Fabian Lalfakawma, Chawlhmun, treasurer-ah finance secretary ni lai, Roneihthanga, Nursery veng leh finance secretary MS Ralte, Upper Republic thlan an ni.
Central YMA hruaitu thlan thar zingah hian OB ni lai panga awmin finance secretary atan thlan hi OB la ni ngai lo, mi thar a ni a, Central YMA hruaitu ni lai, an post ngai la chelh thei zingah president ni lai, R. Lalngheta chu thlan chhuah zingah a tel ta lo a ni.
Hruaitu thar thlan hlan hian Zialung Community Hall-ah variety programme neih a ni a, inkhawm hi CEC member Joseph Vanlalhruaia Sailo chuan kaihruaiin, Ramngaw leh Nungcha humhalh tih chungchang zirho a ni bakah HIV/AIDS Awareness Campaign neih a ni a, zai, hnam lam leh lemchan entir a ni.
YMA inkhawmpui lian neih mek hi nizan khan a tiak a, palai thlahna inkhawm hi Zialung Rûnah neih a ni a, president thlan tharin thuchah a sawi a, kumpuan bawhzui thate hnenah lawmman hlan a ni bawk.