Aizawl : Kumin inthlan chu kohhran leh tlawmngai pawl lian ber, YMA te nen an thu ken a inang tlat chu party dangte aia Congress party danglamna a nih thu, Champhai South INC cnadidate Dr Lallianchhunga’n a sawi.
Nimina Champhai South Block Congress Committee buatsaih a, New Champhai Community Hall-ah Congress Party Workers’ Conference neihah thu sawiin Dr Lallianchhunga chuan Mizoram, hnam leh sakhua humhim turin tualto party te tihtheih chin a tlem hle tih a sawi a. Central BJP thiltih dan hi central atanga sut leh ngai vek a nih avangin central-ah Congress party a sorkar theihnan Mizo Kristian ten thapui an thawh a ngaih tih a sawiin, “Kristian taka vote kan thlak a ngai a. Khawchhak nena kan insumdawn tawnna kawnga harsatna awm mek pawh hi a chingfel theitu party chu Congress party chiah hi a ni,” a ti.
Pathian leh mipui zara Congress party an sorkar chuan ‘Tang Puihna’ Rs 2,00,000 in mi taima leh thawkrimte an tanpui dawn tih sawiin Dr Lallianchhunga chuan, “Nakum lawkah central a kan sorkar phei chuan rualbanlo te leh hmeithai te tanpuina leh tar pension, Rs.2,000 ah kan tipung dawn a, BPL leh chhungkaw lu ber hmeichhe awmna chhungkua te tan gas bur khat Rs.750 a ni tawh ang, healthcare pawh cheng nuai 15 a tihpun a ni dawn,” tiin, Congress party chu a thutiamah a ding thin a nih avangin, mipuite hnena an intiamna te hi tihhlawhtlin an tum ngei dawn niin a sawi.
He hunah hian khuallian Dr. Vansanglura, Principal, Serampore College pawhin thu a sawi a. Champhai South INC Congress candidate, Dr.Lallianchhunga’n an party-ah mi eng emaw zat a lawm lut nghal bawk.