Sailulak NGO Coordination Committee leh Sailulak khawchhuak Inzawmkhawm Pawl (SAIKIP) chuan nimin khan Sailulak lal, Lal huaisen Zakapa’n Andaman Jail atanga thiam changa a lo chhuah hnua a khaw din, Sailulaka a thlan hmun sam fai leh phun that hnatlang an nei.
Sailulak Lal Zakapa hi kum 1914-ah Sailulakah hian a thi a, amah pawh an phum nghal a ni a. Zirtawpnia a lung phun an sam faina hmunah hian a ruhro pawh a la awm reng a ni.
Zakapa thlanah hian, ‘Zakapa Lal husein, Dokhama fapa – Veilen hmain kum 20 a lal a, vai a lo lian a, borsap Marliana nen an inti buai a, borsap chu a um a, culcut-ah an inkhing a, sap chu a tlawm ta. Chumi hnuah kum 27 buaina nei loin ro a rel. Kum 75 a tlinin a thi. Thih ni 28.12. 1914,’ tia ziah a ni a. Ama lemte pawh ziah a ni a, Zakapa hi Thangchhuah Pa a nih angin thangchhuahna atana a thahte lem hrang hrang pawh ziah lan a ni.
Zakapa hi kum 1891 khan Bawrhsap Marliana nen an intibuai a, Mizo nulate leh Mizo hnam chhan nan huaisen takin bawrhsap hi a hmachhawn a, hnam chhantu huaisen a nih avangin thangtharten an ngaisang mek a ni.