Aston Villa in Europa Conference League-ah champion thei tura theihna nei zingah an tel tih an lantir a. Dutch club AZ Alkmaar lakah 4-1 in an chak.
AFAS Stadion-ah Villa hian season liamta a semi-final khel AZ hi an thunun hneh viau a. First half-ah minute 13-naah Leon Bailey chuan an goal hmahruai khungin, Youri Tielemans chuan minute 10 hnuah a khung belh.
Second half-ah an striker season tha tak hmang mek Ollie Watkins chuan an goal thumna khungin John McGinn chuan goal khat dang a khung leh bawk.
AZ hian goal khungna remchang nei ve nual mahse an top scorer Vangelis Pavlidis chuan huntha a bawhpelh nual a. An winger Ibrahim Sadiq chuan goal khat a khung.
Aston Villa manager Unai Emery chuan, “Champion thei zingah kan tel tih kan lantir duh chuan nitin hma kan sawn a, kan lantir a ngai. Kan hmaah tute pawh ding se zanin anga kan khelh kha a ngai a ni.” a ti.
Inkhel dangah Fiorentina tan Lucas Beltran-a’n goal hnih a khung a, Jonathan Ikoné, Riccardo Sottil, Lucas Martínez Quarta leh Maxime López ten goal khung bawkin 6-0 in Cukaricki Belgrade an hneh.