- Lallunghnema, Charity Lodge
Chibai ule,
Tha hnem ngai taka ka thu leh hla lo ngaihven a, lo tuipuitute hnenah lawmthu ka sawi mawlh mawlh a ni. Nangni, chhiartute avang hian consumer-te tan kan nung a, kan che a ni ber a. In zârah consumer-te tan kan kal zel dâwn a ni.
MLA Inthlan boruakin min chîm na ta hle mai. Chu tih laia ,’ lo consumer,’ viau mai pawh chu thil awl ai a ni hauh lo. Amah erawh chu,kan hetih mek lai hian, kan nitin khawsakna hi consumer thil a ni vek a, kan zing thawh atanga kan zan mut hun thleng hian consumer thil hian min chen chilh thin avangin eng lai pawhin consumer thil hian min tinsan ngai dawn lo tih hi kan hre chiang êm êm tur a ni ringawt!
Kan sawi a, kan sawi leh thin ang, kan inthlahdah em avang leh kan ngaihsam em avangin kan hlep tur kan hloh a, kan chanvo tur kan chân thin a ni. Chutiangin Consumer Law kan hriat loh luatah tuar loh turah kan tuar a, malsawmna kan hmuh ngei tur pawhin min tlansan a, malsawmna chaw thleng kan dai baw ta thin a ni.
A pawimawh ber chu engkima rinawm leh dik hi a ni! Rinawmna leh Dikna i neih loh chuan eng ang mi pawh ni ulla, lehkha i thiam emaw, thiam lo emaw mi hlawhtling i ni ngai lovang.
Consumerism tihpuitlinna kawngah pawh hma lak ngaihna a awm lo hrim hrim a ni. Consumerism hi mi thenkhat chuan luxury lam hawiin an hrilfiah thin a. Hei hi a dik lo deuh niin a lang.
HETI HIAN KAN SAWI ANG :
Sap tawngin hetiang sawi a ni.
“Protection or promotion of interests of consumers, the growth of consumerism has led to many organisations mproving their services to the consumers,” tiin Oxford Dictionary chuan a sawifiah-
LUNGLEI PANIN KA CHHUAK !
Tunah chuan Lunglei lam zin chanchin ka sawi dawn a ni. Lunglei khawpuiah hian Consumer thil hi ka lo tlangaupui zauh zauh tawh thin a.Tunah hian Association tha tak a awm mek a ni.
Oct 18-ah Maxi Cab-in Lunglei ka pan a. Seat nuam takah ka thu a. Driver fel leh hawihawm tak nen kawng tluanin kan inkawm thei a. Ka hnung chiah seat-ah tlangval pakhat, a tlangval hun laia, ‘Khawvel chen ve thin tak, Pathian khawngaihna changa lo piangthar a, a nun pum Pathian tana hlan, Home Mission-a Evangelist hna thawk ta nen pawh chuan kan inkawm tui tam hman khawp mai. He tlangval hi titi thiam tak a ni a, kan hma lawk November thla a nupui neih tum a nih thu a sawi te chuan a nun a hlim khawp a.Kei pawhin Nupui nei tura chu ka lawmpui hle a ni. He tlangval fel tak nen hian phone number-te kan inpe a. Kan inchhar a ni ber! An inneihna a tel ve tura min sawm phei chu ka beisei pha lem lo. He tlangva fel tak Opi-a hi ka theih chen chen ka hre reng dawn a nih hi!
KA HA(tooth), KA THIANPA KA CHÂN TÊP
Tluang takin kan kal zel a, Sialsuk kan tlan pelh hnu lawkah chaw fak turin motor atang chuan kan chhuk sang sang a,’Châk Khai’ Hotelah ngei mai chuan kan inhnawh puar a.
….. Tin, heti hi a ni ta tlat mai! Ka nin hlei a phengin …..chaw ei kham dawn a ruâiah arsa ruh ka han khel ve ngawt pek a.E heu… pawi ka ti lutuk,! ka thian duh tak, ka hâ chu a ri ta rawp mai! Ka hâ a bal chu lo niin! Ka rilru a na ta hle a. Heti hian ka thinlungah thu a lo thleng a.“Hetianga ka hâ,ka thianpa ber ka chân si chuan ka tawng tha hlei thei dawn si lova. Ka programme ruahman zawng zawng a hlawh chham vek dawn a nih hi! A pawi vawng vawng em mai!,” ka ti ta ringawt mai a.Ka chunga thil lo thleng chu ka han sawi chuan Hotel neitute chuan pawi an tiin min khawngaih hle a,”‘Hotel ei man kan free ang che, A pawi em mai,”an ti nâin an mi duhsakna chu tâwk hlein ka hria a, chuvangin hotel man chu ka pe lui ta tho a ni. He Hotel neitute leh enkawltu chungah hian ka lawm em em a ni. Mi tha tak an niin ka hria.
Ka ha duh tak chu ka ak tha a, Lunglei chu kan pan leh ta a. Ha bal chung chuan tawng a lo har a, thil lam a fiah thei lo bawk. Lunglei kan luh ve leh ka chhungte in pawh pan ta lo chuan ka u Liana nupui Mawitei nen chuan Dental Surgeon Tetei kan pan ta nghal a. Tetei Dental chu kan han thleng a, ka ha chu min siam that sak ta hlauh mai a. Ka lawm a,ka lawm zia mai chu!Ha siam man lah chu min tih tlawmsak em em mai a,tlemte tak meuh meuh ka pe! Emergency thil a ni leh nghal si ! . He Ha Doctor hi ka theih nghilh ngai tawh lovang.
PRESS CONFERENCE CHU!
Tichuan, Press Conference hlawhtling tak ka neih theih nan kan nau F.Lalngaihzuala, Journalist (LPS) chuan hma min lo laksak thlap a. Chanchinbu mite ka kawm hma hian nau anga ka neih IAS hial ni pha,officer fel el tiang Deputy Commissioner Pi Ramdini chu a Office Chamber-ah ka hmu a.Thingpui ka in a, min lo duat hle. Hemi hnu hian ka unaupa Pu Chawngchhuma Politician- Journalist lar leh hriat hlawh tak chu an inah ka tlawh a. Ani hi Press Conference ka neih naah pawh min titlang neltu a ni.
Chhim bial khawpui hi a neitu zinga mi ka ni vein ka inhria a, Laina hnai ka nei a, chhungkhat hnai vai ka nei a, ka thisen zawmpui an awm nual bawk a. Chuvangin he khawpuiah hian ka mikhual lo hle a ni. Consumer-te Dikna leh chanvo chungchangah he Lunglei khawpuiah hian hun ka lo hmang zeuh zeuh tawh a. Press mite pawh ka lo hma chhawn tawh bawk. Tun tumah hian MJA Press Club thawm that a nih avangin YMA Hall-ah Press Conference chu kan nei a. Hetah hian Lunglei Diet Consumer hruaitute: Pu Hminga, Preisdent, Pu Chama Secretary, leh Ka thianpa Upa M.Thansiama ten min tawiawm a. Anni zarah hian kan mualpho lova, ka lawm hle a ni.
Ka Programme thupui ber zinga mi Centre For Consumer Education chungchang chu ziakin Press-ho ka sem a, ka sawi zau bawk a. He Centre hi Mizoram a pakhatna tur a nih thu tih leh Centre hmalak dan turte chu ka sawiin thawhpui atan chanchinbu mite chu ka sawm bawk a ni.
He Consumer Centre hmalakna tawiawma thawhpui atan Pawl hrang hrang leh office engemaw kan sawm tihte chu puan zar a ni bawk a. Press Conference kan neih report pawh zan leh zing TV news-ah kan lo hmu zui nghal a. A lawmawm em em a ni.
Chhiartute hriat atana ka duh em em chu Centre For Consumer Education hian Consumer-te chsnvo leh zalenna humhalh a nih theih nan zau zawka zirtirna pek chhuah hna a thawk zel dawn a. Consumer-te ven him an nih chungchanga hriat tur nei leh harsatna tawkte chuan an pan thei,tih hi a ni.
MIZORAM POWER DINHMUN HI:
Power hmangtute hi consumer kan ni bek a.Consumer kan nih avangin tih tur leh hriat tur kan ngah hle a ni.Kan power hman zat hi nitin a danglam hret hret a, mahse a tlangpuiin a danglam nasa lem lo. A hnuaia ka tarlan ang hi kan dinhmun tlangpui a ni a. Beng tivartuah ka han pho chhuak ve hrim hrim a ni.
- Power kan hmuh dan, October 24.2023 angin: A) Central Sector(NEEPCO): 56.08 MW B) State Sector: 1.Tuirial(Solar) – 1.06 MW 2.Vankal (Solar) – 8.74 MW 3.Serlui B – 4.03 MW 4.Maicham -. 1.00 MW 5.Kau Tlabung – 1.05 MW
- Total – 16.85 MW
- G/Total – 72.93 MW
Power kan hman tam lai ber,(peak hour) 5.15 pm-ah= 131.33 MW. Kan hman tlem lai ber 3 am- ah = 44.20 MW.
Power hi kan la intodelh lo hrim hrim a.Thar chhuah kan la nei tam tawk lo hlea,kan la intodellh lo hle tih heta kan tarlan atang hian a chiang em em a ni.Power lei nan sum kan seng nasa hle thin a ni.
Kan sawi thin tawh angin The Electricity Rules hman thar angin tunah hian Consumer Grievances Redessal Forum chu Circle tinah din a ni tawh a.Aizawl Circle atan hian SE pakhat Chairman-na hnuaiah EE pakhat leh consumer aiawh pakhat Member an ni a.Kawlphetha hman kawnga harsatna awmte chu he Forum hian a ngaihtuah thin dawn a ni.
Please visit: Centre For Consumer Education, Republic, Mual Vengchung, Aizawl. Pin-796001
Cont: 9862288182/9402321590