India chhim lam, Andhra Pradesh-a Pathiannia mihring phur rel insu-ah mi 13 vel an thi a, mi 50 chuangin hliam an tuar bawk.
Chhanchhuah hna thawh mek niin emergency worker thahnem takin a hmun then fai hna an thawk mek bawk.
Thuneitute chuan tuna an hriat theih chinah chuan ‘mihring tihsual’ vanga chetsualna hi thleng nia an hriat thu an sawi.
Prime Minister Narendra Modi chuan thi chhungte a tawrhpui thu leh railways minister nen pawh an sawi dun tawh thu a sawi.
Chetsualna hi Vizianagaram district-a Pathianni zana thleng kha a ni.
Thuneitute chuan mihring phur pindan pathum, Visakhapatnam leh Palasa inkara tlan chu rel dangin a sut hnuah zan dar 7:00 velah a kawng a zawh sual niin an sawi.
Rel hi a chunga hrui a chah avangin a kawngah a ding a, hetih lai hian mihring phur, Visakhapatnam leh Rayagada inkara tlan hian a hnung lam atangin a su ta niin railway thuneitu pakhat chuan Reuters news agency hnenah a sawi.
Ambulance, doctor, nurse leh chhanchhuah hna thawktu thahnem tak thawn nghal niin passenger leh ruangte chu an la chhuak.
East Coast Railway-a Chief Public Relations Officer Biswajit Sahu chuan ‘mihring tihsual’ vangin an insu niin a sawi a, rel pahnihna zawkin ‘signal a pek dik loh vang’ niin a sawi.
Chetsualna thleng vang hian rel zin tur 33 chu thulhtir niin 22 dang chu an kawng thlaksak an ni a. Railway thuneitute hian Thawhtanni zan atang khan dan pangngaia an tlantir leh theih an inbeisei thung.
Andhra Pradesh Chief Minister YS Jagan Mohan Reddy-a pisa chuan Thawhtanni khan chetsualna hmun hi tlawh nghal a nih tur thu zingah a puang a. Thi chhungte hnenah zangnadawmna pek an ni dawn tih puan a ni bawk.
India hi khawvela rel zin nasat berna ram zinga mi niin ni tin mi maktaduai tel an chuang thin a; mahse, a hmanruaten thuam that an mamawh hle thung.
Thla khat awrh chauh liam taah pawh khan Odisha-ah rel pathum intawh sualna thlengin mi 292 zet thiin sang chuangin hliam an lo tuar tawh.
He thil thleng avang hian railway-a thawk mi pathum man an ni a, kum 20 zet chhunga rel chetsualna thlenga thi an tam ber tum a tling.