MPCC Chief Spokesman Ronald Sapa Tlau chuan nimin khan Aizawl Press Club-ah thu thar thehdarhtute a kawm a, BJP thawhpui tur atan tun dinhmunah MNF ni lo, thawhpui theiha an neih dang chu ZPM chauh an ni hrih tih a sawi.
Ronald Sapa Tlau chuan tun hnaiah Delhi lam BJP-in Mizoram inthlannaah BJP chu sorkar lamah an tan tur thu an puan te, BJP National President JP Nadda-a’n an sorkar chuan MNF sorkar SEDP hnuaia eirukna chhuitir an tum thu a puang te, MNF-in hmelma doa BJP-in an do thu an puangte hian awmze thui tak a nei niin a sawi.
Mizoram politic zirmiten ‘BJP party chuan a tam berah Mizoram Assembly seat paruk bak an hmu lo ang,’ an tih mek laia BJP-in an candidate pakhat deputy CM a nih tur thu an puang hmak ngam atang hian thil pahnih chiang taka kawh a neih thu sawiin Ronald Sapa Tlau chuan, “BJP-in tun hnaia an beih tak MNF party ni lo, tualto party dang thawhpui atana biak rem an nei tawh a ni ang tih leh, an biak fel party chuan CM post an chanin an lungawi a ni tih leh, Dy. CM post pekchhuah pawh an lungawi a ni tihte hi a ni,” a ti.
Ronald Sapa Tlau chuan, “BJP thawhpui tur atan, tun dinhmunah hian MNF ni lo thawhpui theiha an neih dang chu ZPM chauh an ni hrih si a. Chutih laia kan ram, hnam leh sakhua min tihchhiatsak vek tum mektu, BJP an la sawi chhe hauh lote hian mipui mak tih a hlawh hle,” a ti bawk.
BJP-in an thawhpui tur an rawn ti-ualau ta mai hian mipui mak tih a hlawh hle nia sawiin MPCC chief spokesman chuan, “An thawhpui tur an rawn tar lante tan phei chuan an tawmna buka atom bomb rawn thlak ang hialah an ngaih pawhin a mak miah lo ang le,” a ti a. PM Modi-a Mamit-a a rawn zin chuan an thawhpui turte tan hlawkna aiin chhiatna lam a thlen an hlauh vanga lo zin lo tura zuk ngen an awm an rin thu a sawi.
Tun tum MLA inthlan tur chu a boruak a dangdai hle tih sawiin, “Tuten emaw hidden agenda-a an lo neih khiau kha, khulama an thawhpuite fimkhur tawk loh vang nge ni, open agenda a lo ni ta mai chu a ni a,” tiin Ronald Sapa Tlau chuan, hetiang a nih takah chuan Zoram mipui rilrua insiam ta sung sung mai niin thil chik mite chuan an sawi tih a sawi bawk.