Aizawl: MPCC Media department-in nimin khan Aizawl Press Club-ah thu thar thehdarhtute kawmin tuna ram dinhmun dik tak chu MNF leh ZPM-ten NDA/BJP-a tlatlum zawk nih an inchuh mek niin an sawi.
MPCC Media department member David Zochhuanmawia chuan BJP hian an thawhpui, MNF chu zawi zawia thlauhthlain ZPM chu thawhpui theih zawka an ngaih avangin ruahmanna felfai tak an nei nia an hriat thu a sawi a. MNF leh ZPM-te hian NDA/BJP-a tlatlum zawk an inchuh mek nia sawiin, “Mipui hriatah a hmingin han inbei ve bawk thin mah se, blood group pakhat nei an nih avang leh hman atanga lo thawkho thang an nih avang hian an tan sorkar intawm siam turin thian hlui chaw eikhawm ang chauh kha a ni mai dawn a ni,” a ti.
David Zochhuanmawia chuan March, 2014 thla daih tawh khan ZPM Leader Lalduhoma leh BJP-te hian thawhhona thuthlung an ziak tawh tih a sawiin, “Kum 2015-a AMC inthlan leh Aizawl North III bye-election-ah pawh khan Pu Lalduhoma leh a hote chu NDA candidate angin inthlan an chuh daih tawh,” tiin, BJP leh ZPM hotu, Lalduhoma inlaichhina chu thil thar a ni lem lo tih a sawi.
Tun hnaiah a ruka an thawhpui turte nen Guwahati-ah inbiaa zin angin Lalduhoma chu sawi a nih thu leh BJP pawhin a lakah rinna an nghat viau nia an hriat thu sawiin David Zochhuanmawia chuan, “Central-a an hruaitu rawn kalte pawhin sorkarna siampui theih mai tura inngaiin chief ministerial candidate puang hauh si lovin deputy chief minister candidate-te an ruat ve tawp mai a ni,” tiin, hei hian mipui nawlpui leh an party mi tam zawk pawhin an hriatpui lem lohvin inremsiamna thuthlung an lo nei daih tawh tia ngaih theih a nih thu a sawi bawk.
ZPM hotupa thurawn angin BJP sorkar chuan income tax official-te tirin CM David Zochhuanmawia chuan, “BJP hian an party malin kua an hreuh theih lohna tur nia an hriat, Mizoram bakah India ram state dangah pawh tualtote thawhpuiin sorkarna chang anga tar lan hi an chin than pakhat a ni,” a ti.
David Zochhuanmawia chuan Congress party chu ngaih pawimawh bera a neih chu ram, hnam leh sakhua himna tur a nih tur sawiin, hei hi hi a him lo a nih chuan hmasawnna hi awmze nei lovah an ngaih thu leh Mizo Kristian tana hlauhawm chu Hindutva ideology kalpui burtu, BJP an nih thu a sawi a. India ram Hindu lal rama din tum burtute hi Congress party chuan vulh len tum chi-ah a ngaih loh thu leh political party zingah BJP nena inmawngzawm hreh hauh lo an awm reng chu pawi an tih thu a sawi bawk.