MNF sorkarin a sorkar kum nga chhunga thalaite hna a hmuhsak zat an sawi chu a dik tawk lo niin MPCC Media Chairman Lalremruata Renthlei chuan a sawi.
Nimin khan Aizawl Press Club-a thuthar thehdarhtute kawmin MPCC Media chairman chuan kum 2018 inthlanpui hma khan MNF chuan thalaite hnenah eizawnna tha leh hna tam zawk siamsak thei turin intiam nasa hle mah se, tun kum nga chhung hian Mizoram chhungah Aizawl phei chu thalai hna nei lo tamna ber niin, thalai za zela 29-te chuan hna nei loa chhut a ni a. Kolasib leh Mamit district-a thalai za zela 20 hna nei lovin an awm mek a, mipa aiin hmeichhe hna hmu lo an thahnem mek tih a sawi.
Lalremruata Renthlei chuan, “MNF sorkar chuan an sorkar tun kum nga chhungah hna 7,983 lai thalaite hmuhsak angin an inchhal a, he thilah hian thu dik tawk chiah lo a awm a. Hna 7,983 pek an tihah hian 4,437 chu department chhunga promotion hmanga lak niin, hna 1,394 chu departmental exam hmanga hnawh khah a ni. Chumi awmzia chu 2018-2023 chhungin MNF sorkar hian hna 2,218 chauh direct recruitment hmangin a la tihna a ni,” a ti.
Tunah hian Mizoram police-ah ringawt pawh hna ruak 4,194 lai a awm a. Covid vanga buaina chhuanlamin home minister chuan an hnawh khah theih loh thu a sawi a. Congress sorkarin a din polytechnic pathum pawh an enkawl chhunzawm theih loh thu leh zirtirtu pawh a dah thei lo niin a sawi bawk.
Tun hnai assembly speaker leh assembly secretariat lama an hotute chet danah mipui rilru a tina tih Lalremruata Renthlei chuan a sawi a. MNF sorkar hnuaiah hian MNF mi leh sa induhsakna a tamzia chu hriat vek a nih thu sawiin, “SEDP hnuaiah zirtirtu 771 an lak pawh MNF mi leh sa vek an ni a. Kamrul Laskar leh Zoramchhana te duhsakna bik dawnte erawh sawi thui ngai lovin Zoram mipuiten kan hriat kha,” a ti.
Mizoram chhunga hna a vân luatah thalai tam tak ram pawnah chhuakin an theih ang ang hnate thawkin chhungkua an chawm tih sawiin Lalremruata Renthlei chuan, “Heng foreign thlenga kan thalaite chhuahna chhan lian tak pakhat chu kan ram chhunga hnathawh tur mumal awm loh vang a ni,” tiin, ram pawna hnathawka chhuak Mizo thalaiten an hnathawhna hmun hrang hrangah hian harsatna liam tak tak an tawk fo tih a sawi.
MPCC Media chairman Lalremruata Renthlei chuan Congress an sorkar chuan Young Mizo Entrepreneurship Programme (YmElevate) a din tur thu leh thalaite tan startup fund siamin hna nuai khat siam an tum thu a sawi a. Skill development lamah tan lak a nih tur thu leh, Mizoram Youth Commission pawh tihlen leh mumal zaka kalpui a nih tur thu a sawi bawk.