Kum 2017 khan Manchester Arena-a bomb puahna khan nghawng nei chhunzawm zelin, South Wales Police leh Crime Commisioner Alun Michael chuan Cardiff-a Beyonce concert-ah facial recogniation hman a ni dawn, tih a sawi.
An hmal atanga pawikhawih ching leh firfiak an nih leh nih loh rang taka enfiah theihna hi event pawimawh angah te rim taka hman lo ni tawhin, thuneitute’n khauh takin ankalpui thin.
“He concert-ah hian a bik takin hmeichhe tleirawl lam an pungkhawm tam dawn a, venhimna khauh lehzuala kalpui a ngai,” tiin Alun Michael hian a sawi.
Artificial intelligence (AI) thiamna hmanga kalpui hi police te hian misual leh pawikhawih ching manchhuahna kawngah awmze nei takin an lo kalpui tawh thin a, police-in ‘watch list’ an neih list angin an hmel hmang lan dan an lo khaikhin zung zung a, CCTV footage hi record thlap niin, ni 31 thleng a dahthat leh enfiah theih a ni.
Hetih lai hian heti anga camera hman hi mihring dikna leh chanvo hum halh pawh te chuan an duh lovin, an helh hle thung. Mihring dikna leh chanvo bakah mimal zalenna leh privacy thlengin a bawhbuai ah ngaiin, ‘facial recognition’ an duh loh thu vawi tam an lo tlangau pui tawh.
Amaherawhchu, thuneitute leh venhimna lamah thawktute chuan Manchester khawpuia Ariana Grande cocert-a thisen chhuahna thleng atang khan pawikhawihna lian tham a awm loh nan leh lo inven lawk nen AI thiamna hmanga an hmel lan dan lo enfiah zung zung a, ‘watch list’ an neih nena lo thlitfim zung zung chu mipui mimir him nan tul an ti bawk si a ni.