Prime Minister Narendra Modi-a sorkar sawisel nasa tak thin, Moitra-i hi tun hnaiah parliament-a a zawhnate chu miin sum an pek avanga zawt thin nia puh a ni.
TMC MP hian an puhna hi nasa takin a pha thung a. ‘Eng ang chhuina’ pawh hmachhawn a inpeih tih a sawi.
Ningani kal ta khan ethics committee hmaah pawh a inlan tawh a, anni hi an puhna ngaihtuahtu an ni.
Committee hmaah hian Inrinni thleng hun pe turin a dil a, an phalsak lo niin a sawi a, a inlan a ngaih phah.
Ningania a inlan hnuah hian eptu MP dangte tawiawmna karah committee chief Vinod Kumar Sonkar chu ‘tih dan phung lo takin a che’ niin asawi nghe nghe.
Sonkar-a hi rorel lai, BJP atanga MP a ni ve thung.
Committee-a a inlan tum hian Sonkar-a hian member dangten khap mah se ‘mi mal thil deuh deuh’ thlengin a zawt niin Speaker hnenah lehkha a thehluhah a sawi.
Sonkar-a erawh chuan Moitra-i hian an thil chhui mekah a pui tha duh lo va, ‘zawhna pawh pehhel zel a tum’ niin The Indian Express chanchinbu hnenah a sawi ve thung.
Moitra- puhna hi BJP MP tho, Nishikant Dubey-a’n complaint a thehluh atanga intan a ni.
Dubey-a hian Moitra-i hian Gautam Adani ta, Adani group chungchangah Modi-a beih nan sumdawng pakhat, Darshan Hiranandani hnen atanga sum dawngin an zawhna a zawt chiam chiam thin niin a puh a ni.
Adani group hi kumin kumtirah khan US-a Hindenburg Research chuan an sum chet veltir danah thil felhlel tam tak an ti niin an tar lang a. Anmahni erawh chuan an pha.
Adani-a hi Modi-a sorkarin a duhsak uchuak nia sawi thin a ni a, hei vang hian Moitra-i pawh hian zawhna zawh chiam chiam a chin phah a ni.
Dubey-a chuan Moitra-in parliament-a zawhna 61 a zawh zinga 50 zet chu Adani group chungchang a nih thu leh hei hi Hiranandani-a hnen atanga zawt tura thamna sum Rs maktaduai 20 zet a dawn vang niin a puh.
BJP hruaitu hian TMC hruaitu a puhnaah hian hnial rual loh finfiahna pawh a nei niin a sawi a, hei hi advocate pakhat, Jai Anant Dehadrai hnen atang a nih thu leh ani hi Moitra-i thawhpui thin niin a sawi bawk.