Mizo professional boxer pathum – Vanlalawmpuia, Laldingliana leh F Zoramchhana’n WBC India title an chuh dawn a, Mizoram in kawnghren pathum kawl zui turin chak ngei an inringtawk.
Ruahman lawk angin Tata SK 612 LPS Pro Fight Title Fight rualin WBC India Championship inhnek pathum a awm dawn a, zaninah Zotea’n Mumbai boxer Adil Rajesh Kumar Singh hmachhawnin super bantamweight title an inchuh dawn a, professional huangah amah aia tawnhriat ngah ni mah se Cherhlun tlangvalin chak ngei a inbeisei a ni.
Pro Fight title fight-ah Zotea a vannei lo va, vawi thum tlawm tawhin title WBC India hnek chhuak turin hun tha a nei mek a, inbuatsaihna a neih that avangin tha taka inlan theih a inbeisei sang hle.
WBA Asia title chuh tawh Zotea hian professional boxing tum 10 a khelhna tur chiah a ni bawk a, vawi ruk chak tawhin tum thum a tlawm a, a hmaa ding tur Adil Rajesh chuan tum kua hnehna chang tawhin vawi li a tlawm bakah tum hnih a inhnehtawk tawh.
Inhnek dangah Tuipui tlangval Dinga’n WBC India bantamweight title a chuh ve thung dawn a, Chennai boxer Pradish A nen an intawng ang. Dinga’n professional vawi thum a khelh tawhah hnehna chang vekin Pradish hian tum thum tho khel tawhin tlawm a nei lo va, vawi hnih chakin tum khat a inhnehtawk.
2019 khan a vawi khat nan Pro Fight-ah Dinga a champion a, hemi hnu hian professional luhchilhin Pro Fight-ah a tel zui tawh lo va, a zin kawng tluang tawk lo mahse tun tumah hun tha a neih tihlawhtling ngei a duh a, NTP boxing training centre-ah ngawrh takin a inpuahchah.
Naktuk zanah WBC India super lightweight title inchuhin Khuangthing fighter Awpa leh Chennai boxer Gugan Kumar an inhnek ve thung dawn a, hnuhma an neih tawhah Mizo tlangval a chungnung zawk a, rin hlawh ni chungin hruihrual chhungah a lut ang.
A tirah Awpa’n Pro Fight light title a kawl mek humhim turin rilru a siam hman a, mahse, WBC India title chuh theihna hun tha a neih leh tak avangin Pro Fight title kalsanin chona thar a hmachhawn dawn a, professional huanga tum 10 a inhnek tawhah vawi ruk chakin tum thum a tlawm a, vawi khat a inhnehtawk.
Hetih lai hian Tamil Nadu boxer Gugan-an tum thum hnehna chang tawhin vawi hnih a tlawm a, tum hnih a inhnehtawk a ni.
- TATA SK 612 LPS PRO FIGHT
LPS Arena, Falkland Veng - Zirtawpni zan Title Fight:
MIDDLEWEIGHT – Round 4
C Lalhruaitluanga (Chawngtlai) v F Lalthanliana Junior (Lunglei Electric Veng)
WBC INDIA SUPER BANTAMWEIGHT CHAMPIONSHIP – Round 8
Adil Rajesh Kumar Singh (Mumbai) v F Zoramchhana (Cherhlun)
WBC INDIA BANTAMWEIGHT CHAMPIONSHIP – Round 8
Pradish A (Chennai) v Laldingliana (Tuipui)
BANTAMWEIGHT – Round 4
Laldinsanga (Lunglei Ramthar) v Ramdinthara (Pangzawl)
- Inrinni zan Title Fight
WELTERWEIGHT – Round 4
Lalruatzela Hauzel (Mission Veng) v Vanlalruatpuia (Saikhamakawn)
LIGHTWEIGHT – Round 4
C Lalhruaitluanga (Cherhlun) v HC Lalramfela (Chawngtlai)
WBC INDIA SUPER LIGHTWEIGHT CHAMPIONSHIP – Round 8
Gugan Kumar (Chennai) v Vanlalawmpuia (Khuanthing)
FLYWEIGHT – Round 4
NT Lalbiakkima (Siaha) v Vanlalenkawltira (Champhai Dinthar)