Bayern Munich top scorer Harry Kane-a’n a team thar tana innghahna a ni nghal tih a lantir chhunzawm a, inkhel tawp dawn lamah minute sarih chhunga goal hnih khungin 2-1 in Galatasaray lakah hnehna an chang a, knockout stage khel turin an tling chiang tawh.
Nilaini zanah Allianz Arena-ah Bayern Munich hian an Turkish mikhualte lakah hian awlsam takin result tha an nei bik lo.
First half ah team pahnihten chance an nei ve ve a, Bayern goalkeeper Manuel Neuer chuan a team goal chhuah tur a dansak tha thin a, lehlamah Fernando Muslera pawh a awl lo.
Minute 80-naah England captain in Joshua Kimmich free kick a tauh lut a, minute ruk hnuah an goal hnihna khung belh leh bawkin huntawp hma in Galatasaray in Cédric Bakambu hmangin goal khat an khung.
Kane hian Bayern tan match 15 khel tawhin goal 19 a khung tawh a. UCL a chanchin a English player goal 25 khung tling thei pathumna a ni.
German champion in khelh hnih la hmabak mahse an dinhmun a chiang tawh a. Hetihlai hian tunge an hnung zui dawn tih hriat a la ni lo.
Parken Stadium-ah FC Copenhagen in Manchester United an mikhual a, 4-3 a an chak avangin Group A a la inhawng.
United in striker Rasmus Hojlund hmangin minute 3-na leh 28-naah goal an khung a. Danish striker in a club hlui lakah hattrick a siam teuh.
Mahse Marcus Rashford chu minute 42-naah a ball khuap turin Elias Jelert a rap fuh palh a, red card hmu in inkhel a danglam.
Danish team an phur sawt a, minute thum hnuah Mohamed Elyounoussi chuan goal khungin halftime hma in Diogo Goncalves chuan penalty atang an si phurh a sut.
Second half-ah United in Bruno Fernandes penalty hmangin goal an khung leh a, mahse huntawp dawnah che buai lehin Lukas Lerager chuan an si phurh a sut hnuah kum 17 mi Roony Bardghji chuan an chakna goal a khung.
Manchester United manager Erik ten Hag chuan, “Red card khan engkim a thlak danglam a, khami hma kha chuan kan khel tha hle. Goal hnih kan chhuahte kha pawm loh tur a ni bawk. Kan tan chuan zan lungawithlak loh tak a ni.” tiin a thlirlet.
Blancos an tling
An fachuam thar Jude Bellingham khel lo mahse Real Madrid in a zawna vawi li nan hnehna an chang a. Braga lakah 3-0 a chakin an tling chiang tawh.
Santiago Bernabeu-ah chawlh hahdam tir Bellingham aia khel Brahim Diaz chuan goal hmahruai a khung a, Vinicius Junior leh Rodrygo ten an chhunzawm a. Carlo Ancelotti pawlte hian Napoli laka point an hmuh leh chuan pakhatna an ni chiang tawh ang.
Gunners dinhmun a tha
Arsenal in Group B-ah tling thei tura dinhmun thaah an indah a. Spanish club Sevilla hmachhawnin 2-0 in an chak.
Emirates Stadium-ah Gunners tan Leandro Trossard leh Bukayo Saka ten goal an khung a. Lens in PSV Eindhoven hneh se tling chiang thei tawh an ni a, mahse Dutch club an chak avangin an nghah a la ngai.
Gunners winger Bukayo Saka chu inhliam avangin inkhel tluan lo mahse inkhel zawh tawh hnuah a manager Mikel Arteta chuan hliam na tak a nih a rinawm lo niin a chanchin a sawi.