Union Cabinet chuan ram chhunga thil hrang hrang siam chhuahten hma an sawn lehzual theih nan Production Linked Investment (PLI) scheme hnuaiah sector 10-te tan Rs. maktaduai hnih pek tur chu a nemnghet.
Union Minister Prakash Javadekar chuan chanchinbumite hnenah, “Union Cabinet chuan sector pawimawh 10-te hnenah PLI scheme chu India rama thil siam chhuahten hma an sawn theih nan leh thawnchhuah kawnga hmasawnna atan a nemnghet,” a ti.
Heng sector pawimawh 10-te hi advance chemistry cell battery, kawlphetha hmang bungrua, lirthei leh a kaihhnawih, damdawi, inbiakpawhna lam, puanthan, ei leh in, inchhungkhura pawimawh khawlte leh thir lam siam chhuahnate an ni ang.
Tun hma deuh pawh khan sorkar laipui chuan hetiang deuh chiah hian mobile phone siam chhuahna lamah India siam thawn chhuah a tam zawk theih nan thutlukna a lo siam tawh a ni.